Nur-Sultan qalalyq sailaý komissiiasynyń tóraǵasy Baqyt Bektemisova elorda máslihaty depýtattyǵyna kandidattardyń partiialyq tizimderin usyný jáne tirkeý qorytyndylary týraly baiandady, dep habarlaidy QazAqparat.
«Máslihatqa sailaý alǵash ret saiasi partiialardyń partiialyq tizimderi boiynsha ótip jatyr. Máslihattar depýtattaryn sailaýdy uiymdastyrý men ótkizýdi aýmaqtyq sailaý komissiialary qamtamasyz etedi. Qazaqstan Respýblikasy máslihattary depýtattarynyń kezekti sailaýyn daiyndaý jáne ótkizý jónindegi negizgi is-sharalardyń úlgilik kúntizbelik josparyna sáikes, partiialyq tizimderdi usyný 2020 jylǵy 10 qarashadan 4 jeltoqsan aralyǵynda júrgizildi. Ortalyq sailaý komissiiasy 2021 jylǵy 10 qańtarǵa taǵaiyndalǵan Qazaqstan Respýblikasy máslihattary depýtattarynyń kezekti sailaýyna qatysýǵa Ádilet ministrliginde belgilengen tártippen tirkelgen 6 saiasi partiia jiberilgen bolatyn», - dep toqtaldy Baqyt Bektemisova onlain brifingide.
Nur-Sultan qalasynyń Qalalyq sailaý komissiiasyna 5 saiasi partiiadan: «Aýyl» Halyqtyq-demokratiialyq patriottyq partiiasy» qoǵamdyq birlestiginiń Nur-Sultan qalasy boiynsha óńirlik filialynan, «ADAL» Saiasi partiiasy» qoǵamdyq birlestiginiń Nur-Sultan qalasyndaǵy filialynan, «Nur Otan» partiiasy» qoǵamdyq birlestiginiń Nur-Sultan qalalyq filialynan, «Aq jol» demokratiialyq partiiasy qoǵamdyq birlestiginiń Astana qalalyq filialynan, «Qazaqstan Halyq partiiasy» qoǵamdyq birlestiginiń Astana qalalyq filialynan Nur-Sultan qalasy máslihaty depýtattyǵyna kandidattardyń partiialyq tizimderin usyný týraly qujattar kelip tústi.
«Saiasi partiialardyń filialdary qujattardy «Qazaqstan Respýblikasyndaǵy sailaý týraly» Konstitýtsiialyq Zań talaptaryna sáikes usyndy. Partiialyq tizimderdi tirkeý 2020 jylǵy 10 jeltoqsanda jergilikti ýaqytpen saǵat 18:00-de aiaqtaldy. Partiialyq tizimderge 88 kandidat engizildi, onyń ishinde: «Nur Otan» – 62, «Aýyl» – 5, «Aq jol» – 9, «ADAL» – 9, «Qazaqstan Halyq partiiasy» 6 kandidat usyndy», - dep naqtylady qalalyq sailaý komissiiasynyń tóraǵasy.
Sailaý týraly Konstitýtsiialyq zańy 89-baby 4-tarmaǵynyń talaptaryna sáikes partiialyq tizimde áielder men jiyrma toǵyz jasqa tolmaǵan adamdardyń sany oǵan engizilgen adamdardyń jalpy sanynyń keminde otyz paiyzyn quraýǵa tiis. Qalalyq sailaý komissiiasyna usynylǵan partiialyq tizimderde áielder men 29 jasqa tolmaǵan adamdardyń sany - 36, iaǵni 40,9 paiyzdy qurady.
«Partiialyq tizimderge engizilgen tulǵalardyń zańnama talaptaryna sáikestigi anyqtaldy. Kandidattan kelip túsken ótinishi boiynsha «Nur Otan» partiiasynyń partiialyq tiziminen 1 kandidatty alyp tastaý týraly sheshim qabyldandy. Osylaisha, partiialyq tizimderge engizilgen kandidattardyń sany 87 adamdy qurady, onyń ishinde áielder men 29 jasqa tolmaǵan adamdardyń sany - 35. Sailaý týraly Konstitýtsiialyq zańnyń talaptaryna sáikes, barlyq saiasi partiialar sailaý jarnasyn engizdi. 5 saiasi partiia filialdarynyń partiialyq tizimderin qalalyq sailaý komissiiasy tirkedi jáne olar buqaralyq aqparat quraldarynda jariialandy», - dedi Baqyt Bektemisova.
