Arystaǵy jańa turǵyn úi salý men qiraǵan úilerdi qalpyna keltirýde myńǵa jýyq astanalyq eńbektenip jatyr, dep habarlaidy "Ult aqparat".
«Osydan bir apta buryn kóppáterli turǵyn úidiń qurylysy bastaldy. Bizdiń sektorda úsh kópqabatty turǵyn úi salynyp jatyr. Sondai-aq, tehnikalyq tekseriske sáikes qalpyna keltirýge jaramsyz dep tanylǵan jáne jańa qurylystyń qajettiligi týraly sheshim qabyldanǵan úilerdiń ornyna 150-ge jýyq jańa jeke turǵyn úi salyp jatyrmyz. Jalpy bizge tiesili 9 sektor aýmaǵynda 1500 turǵyn úi-jai bar. Onyń 650-i jeke turǵyn úi jáne 57-i kóppáterli turǵyn úi. Úileri súrilgen arystyq turǵyndar ýaqytsha basqa jerge qonystandy. Jańadan salynyp jatqan úilerden bólek 450-480 úige kúrdeli jáne aǵymdaǵy jóndeý jumystary jalǵasýda», - dedi Nur-Sultan qalasy ákiminiń orynbasary Nurlan Núrkenov Elorda Aqparat-qa bergen suhbatynda.
Onyń aitýynsha, jeke jáne kóp páterli turǵyn úilerdiń aǵymdyq jáne kúrdeli jóndeý jumystaryn 25 tamyzǵa deiin aiaqtaý josparlanýda.
«Bizge tiesili sektorda shamamen 10 myń adam turady. Bul – Arys qalasynyń jalpy halqynyń 5/1 bóligin, al qaladaǵy jalpy turǵyn úi qorynyń 18 paiyzyn quraidy. Árine, jańa turǵyn úi salý úshin biraz ýaqyt qajet, tehnologiiaǵa bailanysty máseleler de bar. Degenmen jumys ýaqtyly, tiisti normalar men qurylys tehnologiiasynyń talaptaryna sáikes júrip jatyr», - dedi ol.
Ákim orynbasarynyń málimdeýinshe, Arystaǵy úilerdi qalpyna keltirý jumystaryna 30-dan astam elordalyq merdiger uiym men 1 myńǵa jýyq jumysshy tartylǵan.
