Eldegi aviajanarmai tapshylyǵynan elorda áýejaiynyń úzdiksiz jumysyna nuqsan kelýi múmkin. Qazir astanalyq áýejaida áýe kompaniialary úshin, tipti turaqty jolaýshylar reisteri úshin de aviakerosinmen úzdiksiz qamtamasyz etýde olqylyq bar, dep habarlaidy QazAqparat.
«Biylǵy qyrkúiek jáne qazan ailarynda Qazaqstanda otyn tapshylyǵyna bailanysty kúrdeli jaǵdai baiqaldy. Qazaqstannyń iri resýrs ustaýshylary men jetkizýshileri aviaotyndy ýaqytyly jetkize almai otyr, bul qazirgi ýaqytta áýejaidyń óńirlik kólik toraby retinde qalypty jumys isteýine keri áserin tigizýde. Máselen, qazir Resei Federatsiiasynyń ónim jetkizýshileri birqatar sebepterge, onyń ishinde ishki suranystyń artýyna bailanysty Qazaqstanǵa aviaotyn jetkizýden bas tartty», - dedi «Nursultan Nazarbaev halyqaralyq áýejaiy» AQ baspasóz hatshysy Ánýar Shalekenov.
Nur-Sultan áýejaiy aviaotyn jetkizý týraly qatań kelisimsharttardyń joqtyǵyn, sondai-aq otynnyń qajetti kóleminiń jetkizilmeýinen bolǵan qiyn jaǵdaidy jáne áýejaidaǵy bar rezervtiń is júzinde jumsalǵanyn eskerip, jolaýshylardan aldaǵy ýaqyttarda bolýy yqtimal problemalarǵa túsinistikpen qaraýdy suraidy.
Qyrkúiek pen qazan ailarynda tapshylyq pen baǵanyń kúrt ósýine bailanysty 14 myń tonna aviaotyn jetkizilmegen. Osyǵan bailanysty búgingi tańda rezervter taýsylǵan.
«Qarasha aiynda birde-bir jetkizýshi aviaotyn jetkizý kólemin rastamady. Jańa kelisimsharttar boiynsha eń jaqyn aradaǵy jetkizý 15 qarashada bolýy múmkin. Biz júk reisterine janarmai quiýǵa shekteýler engizdik jáne jaqynda olardy múldem qabyldamaýǵa májbúr bolamyz. Sodan keiin bul aviakompaniialardy Qazaqstanǵa keri qaitara almaimyz», - deidi Ánýar Shalekenov.
