Ortalyq kommýnikatsiialar qyzmetinde ótken brifingide Nur-Sultan qalasynyń ákimi Altai Kólginov Esil boiynda salynyp jatqan kópirdiń jaǵdaiy týraly aitty, "QazAqparat" HAA.
«Memleket basshysy elordada kópirler men kólik jolairyqtaryn salýdyń mańyzyn atap ótti. Qarasha aiynda Esil ózeni arqyly Táýelsizdik dańǵylyndaǵy kópirdiń qurylysy bastaldy. Buryn qurylys merzimin keshiktirgen sot protsesteri bolǵan. Qazirgi ýaqytta barlyq protsedýralyq sátter sheshilip, kópir qurylysy bastaldy. Bul kópir Táýelsizdik dańǵyly, jańa temirjol vokzaly aýdany, Haziret Sultan meshitiniń aýdany, Qoshqarbaev dańǵyly, Nájimedenov kóshesi, Baitursynov kóshesi, Qordai kóshesi, Ainakól kóshesi, Momyshuly dańǵylynyń sol jaǵalaýymen qosymsha bailanysty qamtamasyz etýge múmkindik beredi», - dedi ákim.
Onyń aitýyna qaraǵanda, Táýelsizdik dańǵylyndaǵy kópir paidalanýǵa berilgennen keiin Máńgilik el dańǵylyndaǵy júkteme 20%-ǵa deiin tómendeidi.
«Bul kópirdiń qurylysyn 2023 jyly aiaqtaýdy josparlap otyrmyz», - dedi Nur-Sultan qalasynyń ákimi Altai Kólginov.
Sonymen qatar, qala basshysy Uly dala dańǵylynda kópir salynyp jatqanyn atap ótti.
Onyń paiymynsha, Esildiń oń jáne sol jaǵalaýyn jalǵaityn kópir Máńgilik el dańǵylynyń, J.Nájimedenov, A. Baitursynov, R. Qoshqarbaev kósheleriniń, Nova city aýdanynyń, «Myńjyldyq» alleiasynyń júktemesin azaitady.
Jańa «Nurly jol» vokzalynyń, Telman turǵyn alabynyń, Metro gipermarketi aýdanynyń, Promyshlennyi turǵyn alabynyń, Jumabaev dańǵylynyń, Júrgenov kóshesiniń jáne t. b. qoljetimdiligin arttyrady.
«Sonymen qatar, keiingi eki jylda elordada 300 kóshe salynyp, jóndeldi. Olardyń jartysynan kóbi turǵyn úi alaptarynda ornalasqan. Sondai-aq, jańa baǵyttar, avtobýs jolaqtary iske qosyldy, avtobýs parki jańartylýda. Munyń bári qala turǵyndaryna qala ishinde yńǵaily júrýge, jol ýaqytyn qysqartýǵa jáne qalany mobildi etýge múmkindik beredi», - dedi Altai Kólginov.
