Elorda 2023 jylǵa deiin áleýmettik salaǵa 1,2 mlrd teńge jumsaidy. Bul týraly Nur-Sultan qalalyq ekonomika jáne biýdjettik josparlaý basqarmasynyń basshysy Qaisar Mańqaraev aitty, dep habarlaidy QazAqparat tilshisi.
«Elordanyń 2023 jylǵa deiingi naqtylanǵan biýdjetinde áleýmettik salaǵa 1 mlrd 254 mln teńge qarastyrylyp otyr. Bul oraida jumyspen qamtýdy basqarý, júrip-turýy qiyn 1-toptaǵy múgedekterdi jeke kómekshimen qamtý negizgi baǵyt sanalady. oǵan 365 mln teńge qarastyryp otyr. Sonymen qatar Densaýlyq saqtaý basqarmasyna PTR-zerthana jabdyqtaryn satyp alýǵa shamamen 200 mln teńge qarastyrylady», - dedi ol Nur-Sultan qalalyq máslihatynyń kezekten tys 76-shy sessiiasynda.
Basqarma basshysynyń atap ótýinshe, elordanyń kólik infraqurylymyn damytýǵa qosymsha 7 mlrd 271 mln teńge, onyń ishinde áleýmettik mańyzy bar ishki baǵyttardy jolaýshylar tasymalyn sýbsidiialaýǵa 5 mlrd 451 mln teńge bólinedi.
«Otyn-energetika kesheni jáne kommýnialdyq sharýashylyq basqarmasyna qosymsha 899 mln teńge, onyń ishinde gaz-kólik júiesin damytýǵa 404,5 mln teńge qarastyrylady. Qurylys basqarmasyna birqatar nysan qurylysyn aiaqtaý úshin 1 mlr 74 mln teńge bólinedi. Qalalyq orta sapasy jáne baqylaý basqarmasynda qosymsha 15 mln teńge kózdeledi. Qorshaǵan ortany qorǵaý jáne tabiǵat paidalaný basqarmasyna 1 mlrd 651 teńge qarastyrylyp otyr», - dedi Qaisar Mańqaraev.
