Nur-Sultan qalasy sanitarlyq-epidemiologiialyq qadaǵalaý basqaramasy basshysynyń orynbasary Janna Pralieva BAQ ókilderine qaladaǵy epidahýal týraly málimet berdi, dep habarlaidy QazAqparat.
«Qazir biz naýqastar sanynyń tez arada kóbeigenin «omikronnyń» paida bolýymen bailanystyryp otyrmyz. Óitkeni keshegi kúndi ózderińiz kórip otyrsyzdar 1442 jaǵdai tirkeldi. Eger jeltoqsan aiynda 2700 jaǵdai tirkelse, keiingi 10 kúnniń ishinde 4622 jaǵdai tirkelip otyr. Iaǵni 1,7 ese artqanyn kóremiz», - dedi ol BAQ ókilderine bergen suhbatynda.
Sondai-aq, maman elordada «omikronnyń» alǵashqy jaǵdaiy qalai anyqtalǵanyn baiandady.
«Qazirgi kezde, ózderińiz kórip otyrǵandai, Nur-Sultan qalasnydaǵy epidemiologiialyq jaǵdai kúrdeli bolyp tur. Bul Densaýlyq saqtaý ministrliginiń málimetinde aitylǵandai, «Omikron» Sars-Cov-2» shtamynyń anyqtalǵanyna bailanysty. Qazir eki aida bir ret genetikalyq-molekýliarlyq zertteý jasalyp otyrady. Ol jerge biz oń nátijeli synamalardy tekserýge jiberemiz. Eń sońǵy ret jeltoqsan aiynyń sońynda 25 synama jibergen bolatynbyz. Sonyń ishinde bir synama oń nátije kórsetip otyr. Iaǵni «omikron» shtamy bar degen sóz. Ol bizdiń qalanyń turǵyny, shetelden 16 jeltoqsan kúni kelgen. Biraq kelgen kezde onyń PTR-test nátijesi teris bolǵan. Biraq 22 jeltoqsanda densaýlyǵy kishkene nasharlap, tamaǵy aýyryp, meditsinalyq kómekke júgingen. Sol jerde oń nátije kórsetken. Sol synamany biz qosymsha zertteýge jibergen bolatynbyz, «omikron» shtamyn kórsetip otyr», - dedi Janna Pralieva.
