Bilim jáne ǵylym ministrliginiń Mektepke deiingi jáne orta bilim komitetiniń tóraǵasy Gúlmira Kárimova elimizdiń qai óńirlerindegi muǵalimder joǵary jalaqy alatynyn aitty, dep habarlaidy QazAqparat.
Onyń aitýynsha, Memleket basshysy bergen tapsyrmaǵa sáikes muǵalimder tapshylyǵy baiqalǵan óńirlerge úzdik pedagogterdi tartýdyń tiisti qoldaý sharalarynyń paketi bar arnaýly baǵdarlama jobasy ázirlendi.
«Arnaiy baǵdarlama jobasyn ázirleý aiasynda óńirlerdegi pedagogterdiń tapshylyǵyn anyqtaý boiynsha taldaý júrgizildi. Máselen, pedagogterdiń tapshylyǵy Atyraý, Mańǵystaý, Almaty jáne Túrkistan oblystarynda saqtalyp otyr. Ulttyq statistika jáne halyqaralyq salystyrmaly zertteýler derekteri birqatar jyldar ishinde nysanaly óńirlerdegi bilim alýshylardyń bilim sapasynyń eldegi ortasha kórsetkishterden artta qalǵanyn kórsetedi. Muny PISA-2018 halyqaralyq zertteýiniń nátijeleri jáne Ulttyq biryńǵai testileýdiń nátijeleri rastaidy», - dedi G. Kárimova Ortalyq kommýnikatsiialar qyzmetinde.
Baǵdarlama pedagogterge respýblikalyq biýdjettiń nysanaly transfertteri esebinen laýazymdyq jalaqydan 100% mólsherinde yntalandyrýshy qosymsha aqy berýdi kózdeidi. Atap aitqanda, olardyń eńbekaqysy eki ese ósedi.
JOO pedagogteri men túlekterin bos laýazymdarǵa tartý úshin Baǵdarlama aiasynda nysanaly óńirlerdiń oblystyq bilim basqarmalary janynan Úilestirý keńesteri, sondai-aq Ministrlik janyndaǵy Konkýrstyq komissiia qurylady.
Konkýrs jylyna eki ret ótkiziledi jáne konkýrstyń kelesi kezeńderi belgilendi: konkýrs ótkizý týraly habarlandyrý, úmitkerlerdiń qujattaryn qabyldaý, kompiýterlik testileý jáne esse jazý, qashyqtyq formatta áńgimelesý. Konkýrs barysynda barlyq úmitkerler turǵylyqty jerine qaramastan teń quqyly, úmitkerler arasynda adal básekelestik jáne ótkizýdiń obektivtiligi, ashyqtyǵy, jariialylyǵy qamtamasyz etiledi.
«Konkýrsqa tiisti beiinder boiynsha joǵary pedagogikalyq, joǵary kásiptik bilimi bar, onyń ishinde turǵylyqty jerine qaramastan joǵary oqý oryndarynyń pedagogikalyq mamandyqtarynyń túlekteri, sondai-aq barlyq qajetti qujattardy kórsetilgen merzimde jáne tolyq kólemde usynǵan pedagogter qatysa alady», - dedi komitet basshysy.
Iriktelgen pedagogter úshin 4 aptalyq biliktilikti arttyrý kýrstary jáne onlain-jáne oflain formattarda seminarlar, vebinarlar men sheberlik synyptary, 8 Ziiatkerlik mekteptiń zerthanalary bazasynda Jaratylystaný pánderi muǵalimderiniń taǵylymdamalary uiymdastyrylatyn bolady.
