Ekologiia, geologiia jáne tabiǵi resýrstar ministri Maǵzum Myrzaǵaliev elimizdiń ońtústik óńirlerindegi egis alqaptarynda qansha sý únemdeýge bolatynyn aitty, dep habarlaidy QazAqparat.
«Biylǵy vegetatsiialyq kezeń turaqty ótti. Degenmen de óte shielenisti boldy. Almaty oblysynda qar jamylǵysy ótken jyldarmen salystyrǵanda 35% az boldy. Ile ózeniniń aǵyndylyǵy eki-úsh esege azaidy. Al sýarmaly jerlerdiń aýdany 2019 jylmen salystyrǵanda 11% ulǵaidy. Joǵaryda atalǵan faktorlarǵa qaramastan, jalpy vegetatsiia sátti ótti dep aitýǵa bolady», - dep málim etti ministr Úkimet otyrysynda.
Onyń aitýynsha, oblysta kúrish egý alańy on myń gektardy nemese jalpy sýarmaly alańnyń eki paiyzyn quraidy. Bul rette kúrish alqaptaryna oblys boiynsha paidalanylatyn sýdyń on paiyzy nemese jylyna 350 mln tekshe metr sý jumsalady.
«Osyǵan bailanysty kúrish egisin qysqartý qajet dep sanaimyz. Al, únemdelgen sýdyń esebinen ylǵaldy az qajet etetin daqyldardyń 40 myń gektar egistikterin sýarýǵa múmkindik paida bolady», - dedi Myrzaǵaliev.
Budan bólek, Jambyl oblysynda 2020 jyly sý kólemi ortasha kóp jyldyq derekterden 15-20%-ǵa tómen boldy. Transshekaralyq ózenderde sý bólý boiynsha týyndaǵan qiyndyqtarǵa qaramastan, oblysta vegetatsiialyq kezeń turaqty ótti. Boljanǵandai sý az tsikldy eskere otyryp, birtindep ylǵaldy az qajet etetin daqyldarǵa kóshý jáne sý únemdeý tehnologiialaryn belsendi engizý kerek.
«Túrkistan oblysynda Syrdariia ózeniniń aǵyny 2020 jyly on bes paiyzǵa jáne onyń negizgi resýrsy bolyp sanalatyn Toqtoǵul sý qoimasynyń (Qyrǵyzstan) kólemi 2019 jylǵa qaraǵanda 2 mlrd tekshe metrge az boldy. Osyǵan qaramastan, sýarmaly sýdy jetkiliksiz berý faktileri tirkelgen joq. Maqtaral aýdanynda 4 myń gektar jerde kúrish ósirilgenin aita ketkim keledi. Eger de osyny qysqartqan jaǵdaida, 158 mln tekshe metr sý únemdeledi. Tiisinshe, osy únemdelgen sýdyń esebinen on úsh myń gektar ylǵaldy az qajet etetin daqyldardy sýarýǵa bolady», - dep túsindirdi ministr.
Onyń sózine qaraǵanda, Qyzylorda oblysy boiynsha sýarmaly jerlerdiń aýdany 251 myń gektardy qurady. Bul - eldiń jalpy sýarmaly alańynyń on alty paiyzy. Osylai bola tura, oblys jalpy respýblika boiynsha paidalanylǵan aǵyn sýdyń 43% nemese tórt tekshe shaqyrym sýdy qoldandy. Jalpy oblys boiynsha aǵyn sýǵa qatysty óte kúrdeli jaǵdai baiqaldy.
«Sonymen qatar, kúrish egistiginiń aýdany 90 myń gektardy quraǵanyn atap ótkim keledi. Al agroónerkásip keshenin damytý baǵdarlamasyna sáikes, egis alańy 75 myń gektardan aspaýy tiis», - dedi M. Myrzaǵaliev.
