Foto: Total.kz
2025 jyly 119-dan astam kitap 240 500 dana taralymmen basylyp, elimizdiń óńirlik kitaphanalaryna jetkizildi, dep habarlaidy Ult.kz.
Olardyń qatarynda «Shoqan. Erek týǵan fenomen» fotoalbomi, Abai Qunanbaiulynyń 180 jyldyǵyna arnalǵan eńbekter, «Baqytsyz Jamal» shyǵarmasy, sondai-aq Iliias Esenberlin, Jumeken Nájimedenov, Qadyr Myrza Áli jáne Tumanbai Moldaǵalievtiń shyǵarmalar jinaǵy bar.
Halyqaralyq yntymaqtastyq aiasynda Italiia tarapynyń qoldaýymen Shoqan Ýálihanov týraly kitaptyń italian jáne aǵylshyn tilderine aýdarylǵan nusqasynyń tanystyrylymy Rim qalasynda ótti.
QR Mádeniet jáne aqparat ministrligi elimizdiń Maindaǵy Frankfýrt qalasynda ótken eń iri halyqaralyq kitap jármeńkesine ekinshi ret qatysýyn da qoldady. Kórmede ulttyq pavilon uiymdastyrylyp, mereitoilyq basylymdar, sonyń ishinde jeti tilge aýdarylǵan «Abaidyń qara sózderi. Urpaqqa Ulaǵat» atty eńbegi tanystyryldy. Al «Baqytsyz Jamal» romany ulttyq prozanyń alǵashqy týyndylarynyń biri retinde halyqaralyq deńgeide joǵary baǵaǵa ie boldy.
Qazaq ádebietin nasihattaý jumysy el ishinde de jalǵasyn tapty. Mádeniet jáne aqparat ministrliginiń ókilderi Beijiń men Gýanchjoý qalasynda ótken halyqaralyq kitap kórmelerine qatysyp, klassikter men qazirgi zaman avtorlarynyń shyǵarmalaryn tanystyrdy.
Jas jazýshylardy qoldaýǵa erekshe kóńil bólindi. QR Mádeniet jáne aqparat ministrligi men Qazaqstan Jazýshylar odaǵy arasyndaǵy strategiialyq seriktestik aiasynda jańa avtorlar býynyn qalyptastyrýǵa baǵyttalǵan úsh aýqymdy joba júzege asty.
Nátijesinde 35 kórkem jáne ǵylymi-tanymdyq jinaq jaryq kórip, kitaphanalarǵa jetkizildi.
