Elimizdiń 3 óńirinde kóktemgi egis jumystary júrgizilip jatyr. Bul týraly búgin Úkimet otyrysynda QR Aýyl sharýashylyǵy ministri Saparhan Omarov aitty, dep habarlaidy "Ult aqparat".
«Osy jyldyń 29 naýryzyndaǵy jaǵdai boiynsha Almaty, Qyzylorda jáne Túrkistan oblystarynda aýyl sharýashylyǵy daqyldaryn egý jumysy júrip jatyr. Atap aitqanda, 67,7 myń gektarǵa jazǵy masaqty dándi daqyldar, 6,5 myń gektarǵa kartop, 10,3 myń gektarǵa kókónis daqyldary, 18,7 myń gektarǵa kópjyldyq shóp egildi. Oblys ákimdikteriniń aqparatyna sáikes, búginde 2,4 mln tonna tuqym quiylǵan. Bul jospardyń 100,2 paiyzy», - dedi ministr.
Onyń atap ótýinshe, 2021 jyly tuqym sharýashylyǵyn qoldaýǵa 11,8 mlrd teńge bólindi. Bul elita tuqymdaryn qoldaný mólsherin 7,4 paiyzǵa arttyrýǵa múmkindik beredi.
«Mineraldy tyńaitqyshtar satyp alýdy sýbsidiialaýǵa oblystardyń jergilikti biýdjetinen 26,1 mlrd teńge kózdelgen. Osynyń arqasynda mineraldy tyńaitqyshtar qoldaný mólsheri 3,3 paiyzǵa artty. Oblys ákimdikteriniń jedel aqparaty boiynsha búginde respýblika diqandaryna kóktemgi dala jumystaryn júrgizý úshin 117,6 mln tonna mineraldy tyńaitqysh jetkizilgen. Qazirgi ýaqytta Almaty, Qostanai, Jambyl, Túrkistan oblystarynda sýbsidiialaýǵa arnalǵan ótinim qabyldanyp jatyr. Jaqyn arada ótinim qabyldaý Batys Qazaqstan jáne Soltústik Qazaqstan oblystarynda bastalady. Qalǵan oblystarda sýbsidiialar tizbeleri men normalardy bekitý jumystary aiaqtalyp qaldy», - dedi ol.
Saparhan Omarovtyń dereginshe, biyl pestitsidti sýbsidiialaýǵa oblystardyń jergilikti biýdjetinde 30,6 mlrd teńge kózdelgen. Bul byltyrǵy jylǵa qaraǵanda 15,8 paiyzǵa kóp jáne qolaily fitosanitarlyq jaǵdaidy qamtamasyz etýge múmkindik beredi.
Al, kóktemgi dala jumystaryn júrgizýge aýyl sharýashylyǵy tehnikasynyń daiyndyǵy - 97 paiyz.
«Egis naýqanyn júrgizý úshin aýyl sharýashylyǵy quralymdarynda 141,7 myń traktor, 73,2 myń tuqymsepkish, 221,2 myń topyraq óńdeý quraly bar. Bir mezgilde birneshe tehnologiialyq operatsiialardy oryndaityn qazirgi zamanǵy egis keshenderi 4,3 myń birlikke deiin ulǵaidy. Buǵan aýyl sharýashylyǵy tehnikasyn satyp alý kezindegi memlekettik qoldaýdyń tiimdi sharalary yqpal etýde», - dedi ministr.
Onyń atap ótýinshe, «QazAgroQarjy» AQ aqparatyna sáikes, jyldyń basynan bastap 24 mlrd teńgege 1 112 tehnika, onyń ishinde 458 traktor, 28 kombain jáne 626 ózge de tehnikany satyp alý qarjylandyryldy.
«Osy jyldyń 29 naýryzyndaǵy jai-kúi boiynsha kóktemgi dala jumystaryn júrgizýge aýyl sharýashylyǵy tehnikasynyń daiyndyǵy 97 paiyzdy quraidy. Tehnikany daiyndaý josparly rejimde júzege asyrylýda. Jappai jumys júrgizý aldynda tehnika daiyndyǵy 100 paiyz quraityn bolady», - dedi Omarov.
