Elimizdegi jumyssyzdyq deńgeii qandai? Azamattardy bul sanatqa jatqyzýdyń qandai tártibi bar? Bul saýaldarǵa QR Eńbek jáne halyqty áleýmettik qorǵaý vitse-ministri Erjan Birjanov jaýap berdi, dep habarlaidy QazAqparat.
«Jumyssyzdarǵa qazirgi sátte eńbek kelisimsharty joq, jumys izdep júrgen jáne jumysqa kirisýge daiyn tulǵalar jatady. Ulttyq statistika biýrosy júrgizgen saraptama negizinde búginde Qazaqstanda 451 myń jumyssyz adam tirkelgen. Paiyzǵa shaǵar bolsaq, bul jalpy jumysqa qabiletti turǵyndardyń 4,9 paiyzyn quraidy. Eger ótken jyldyń dál osyndai kezeńimen salystyrar bolsaq, jumyssyzdyq 2,6 myń adamǵa qysqardy. Ótken jylǵy bul kórsetkish 5 paiyzdy bolǵan», - dedi ol.
Vitse-ministrdiń aitýynsha, bul jait postpandemiialyq kezeńniń ótkendigin, ekonomika birtindep qalpyna kele bastaǵandyǵyn jáne adamdar jumystaryna qaita kiriskendigin bildiredi. Sonymen qatar ol azamattardy jumyssyzdar sanatyna jatqyzýdyń eki tártibi bar ekendigin alǵa tartady.
«Birinshisi statistika organdarynyń suraý salýyna sáikes. Bul halyqaralyq tájiribe ári barlyq elde qoldanylady jáne Halyqaralyq eńbek uiymy usynǵan. Iaǵni, statistika organdary suraý salý júrgizedi jáne árbir keńeńde tsifrlardy engizedi. Kórsetkish – 4,9 paiyz. Bul statistika organdarynyń málimeti. Sonymen qatar vedomstvolyq statistika bar. Bul bizdiń qyzmet kórsetý ortalyqtarymyzǵa - Jumyspen qamtý ortalyqtaryna kelip tirkeletin tulǵalar týraly derek. Búginde olardyń sany 223 myń adam», - dedi Erjan Birjanov.
Onyń atap ótýinshe, Jumyspen qamtý ortalyqtarynda jumyssyz retinde tirkelý úshin jeke kýálik qana kerek. Búginde bul protsedýrany onlain rejimde de júzege asyrýǵa bolady.
