«Jolaýshylar tasymaly» AQ bas direktory Mihael Kortiým vagondarda tazalyq pen qyzmet sapasyn jaqsartýǵa ýáde berdi, dep habarlaidy "Ult aqparat".
«Talgoǵa alǵash otyrǵanymda maǵan ol aitarlyqtai unady. Standartty poiyzdarmen de júrip kórdim. Bári de taza kórindi. Jolserikterdiń barlyǵy jaqsy kóńil-kúimen qyzmet etti. Buǵan qosa, «Jolaýshylar tasymaly» AQ qazirgi ýaqytta «Doichebann» ókilderimen tyǵyz jumys júrgizý ústinde. Biz aldaǵy ýaqytta jolaýshylar tasymalynyń jańa strategiiasyn ázirleimiz», - dedi ol elordada ótken baspasóz máslihatynda.
Onyń aitýynsha, aldaǵy ýaqytta qyzmet sapasyn arttyrýǵa basymdyq berilmek.
«Jergilikti komandany óz mindetin atqarýda jetkilikti dárejede quzyretti dep esepteimin. Dese de, «Doichebannan» áriptesterimizdi shaqyryp otyrmyz. Osylaisha, ýaqyt óte kele komandany kúsheitý josparda bar», - dedi ol.
Eske sala ketsek, «Jolaýshylar tasymaly» AQ-tyń jaqynda ǵana taǵaiyndalǵan bas direktor Mihael Kortiým buǵan deiin jaýapty mekemeniń jumys josparymen bólisken edi.
