Kópbalaly analar jyl basynan beri 93,9 mlrd teńgege járdemaqy aldy. Bul týraly Eńbek jáne halyqty áleýmettik qorǵaý ministrliginen málim etti, dep habarlaidy «Ult aqparat».
«2020 jylǵy qańtar-mamyr aralyǵynda orta eseppen 387,2 myń otbasy 93,9 mlrd teńgege kópbalaly otbasylarǵa arnalǵan memlekettik járdemaqymen qamtyldy. Mamyr aiynda járdemaqynyń bul túrin 396,5 myń otbasy jalpy somasy 20,4 mlrd teńgege aldy», - delingen ministrlik habarlamasynda.
Atalǵan memlekettik járdemaqyǵa tabysyna qaramastan 4 jáne odan kóp birge turatyn kámeletke tolmaǵan nemese kúndizgi bólimde oqityn 23 jasqa deiingi stýdent balalary bar kópbalaly otbasylar úmitker bola alady. Tólem mólsheri 44 532 myń teńgeden (4 bala) 77 951 myń teńgege deiin (7 bala) quraidy, 8 jáne odan da kóp balasy bar otbasylar úshin ár bala úshin saralanǵan túrde 4 AEK mólsherinde bolady. Osylaisha, búgingi tańda tiisti járdemaqynyń ulǵaiýy 8 jáne odan da kóp balalary bar otbasylar úshin jeke mólsherdi belgileý arqyly qamtamasyz etiledi. Tiisti zańǵa Memleket basshysy osy jyldyń 13 mamyrynda qol qoidy.
«8 balasy bar otbasy úshin járdemaqy 88 896 teńgeni quraidy, 9 balaǵa – 100 008 teńge, 10 – 111 120 teńge, 11 - 122 232 teńge, 12 – 133 344 teńge, 13 – 144 456 teńge, 14 – 155 568 teńge, 15 - 166 680 teńge, 16 – 177 792 teńge tólenedi», - dep atalyp ótken vedomstvo málimetinde.
Jalpy, Zań 2020 jylǵy 1 qańtardan bastap kúshine endi, osyǵan bailanysty kópbalaly otbasylarǵa beriletin járdemaqy mólsheri ol taǵaiyndalǵan kezden bastap qaita esepteledi. Osylaisha, tólenbegen soma aǵymdaǵy jyldyń shilde aiynda aýdarylady.
Atap aitqanda, 2020 jyly kópbalaly otbasylarǵa memlekettik járdemaqy tóleýge respýblikalyq biýdjetten 191,1 mlrd teńge qarastyrylǵan.
