Respýblikadaǵy alǵashqy meditsinalyq-sanitarlyq kómek uiymdary ǵimarattarynyń tozýy 55 paiyzdy quraidy. Bul týraly Úkimet otyrysynda QR Densaýlyq saqtaý ministri Aleksei Tsoi aitty, dep habarlaidy QazAqparat.
«Tolyqtai alǵanda, respýblikadaǵy alǵashqy meditsinalyq-sanitarlyq kómek uiymdary ǵimarattarynyń tozýy 55 paiyzdy quraidy. Bul rette ǵimarattardyń eń joǵary tozýy Aqmola oblysynda – 79, Soltústik Qazaqstan oblysynda – 75, Shyǵys Qazaqstan oblysynda – 71, Batys Qazaqstan oblysynda – 69, Atyraý oblysynda – 65 jáne Qyzylorda oblysynda 59 paiyzdy quraidy», - dedi ministr.
Aleksei Tsoidyń aitýynsha, 2020 jyly densaýlyq saqtaý infraqurylymyn damytýdyń perspektivaly josparyna sáikes, 197 ambýlatorlyq-emhanalyq uiym nysanyn salý josparlanǵan. Onyń 63-i ǵana salyndy, 134-i salynǵan joq. Onyń ishinde Almaty oblysynda - 75, Túrkistan oblysynda – 15, Qaraǵandy oblysynda - 10, Aqtóbe oblysynda – 8, Qyzylorda oblysynda 9 nysan salynbady.
«Alǵashqy meditsinalyq-sanitarlyq kómek nysandary 1,5 mln-nan astam birlik meditsinalyq tehnikamen qamtamasyz etilgen. Bul rette jabdyqtalý 76,6, al tozý 49 paiyzdy quraidy. Meditsinalyq tehnikamen tóen jabdyqtalý Soltústik Qazaqstan oblysynda – 55, Qostanai oblysynda - 57, Shymkent qalasynda – 72, Aqmola oblysynda – 74 jáne Aqtóbe oblysynda 73 paiyzdy qurap otyr», - dedi ol.
