Qaraǵandy oblysyndaǵy eski kólikterdi joiatyn zaýyt jyl basynan beri 7 myńǵa jýyq tozyǵy jetken mashinany ýtilizatsiialaǵan, dep habarlaidy Habar 24.
Qazir jumys qarqyn alyp, úsh aýysymda, iaǵni, táýlik boiy júrgiziledi. Sáikesinshe, 24 saǵatta 150-200 kólik joiylady.
Zaýyt qyzmet etken 3 jylda 120 myń eski tehnikanyń kózi joiylǵan. «Bul ekologiialyq ahýalǵa oń áserin tigizdi», - deidi mamandar. Iri zaýyttyń boi kóterýi nátijesinde birqatar shaǵyn kásiporyn shikizatpen qamtylyp, isin júrgizip otyr.
Zaýyttyń jyldyq qýaty 50 myń kólikti eńserýge jetedi. «Qazaqstan naryǵynda tozyǵy jetken temir tulparlar jetkilikti bolǵandyqtan, shikizat tapshylyǵy aldaǵy ýaqytta bolmaidy», - deidi kásiporynnyń qarjy direktory. Bul turaqty jumyspen qamtylǵan 107 adamnyń jalaqysy naryq talabyna sai ósip otyrady degen sóz.
«Kólikti ákep tapsyrǵandar 150 myń teńge, al, jańa Qazaqstanda shyǵarylǵan kólik alatyndar 300 myń teńge kóleminde sertifikat alady. Tipti júrmei turǵan kólikterdi de basqasha baǵalap qabyldai beremiz», - dedi zaýyttyń qarjy direktory Iosifjan Suranqýlov.
Atap ótken jón, atalmysh zaýyt Qaraǵandy oblysynyń erkin ekonomikalyq aimaǵynda 2017 jyly boi kótergen. Sáikesinshe, kásiporynnyń tiimdiligi eskerilip, barlyq salyqtardan bosatylǵan. «Bul memleket tarapynan zor qoldaýdyń belgisi», - deidi zaýyttyń qarjy jónindegi basshysy.
