«Atameken» QR Ulttyq kásipkerler palatasy «Atameken Academy» onlain-platformasymen birlesip, «Jas Ka'sipker» dep atalatyn aqysyz onlain-kýrs ashty.
Atalǵan jobanyń basty mindeti – óz kásibin bastaýǵa nietti jas kásipkerlerge kerekti barlyq aqparattardy ortaq bir tsifrlyq platformaǵa biriktirý. Oǵan elimizdiń túrli aimaǵynan bes myń adam birdei onlain rejimde qatysa alady.
Oqytý beinesabaq arqyly eki tilde (qazaq, orys) ótedi. Kýrs 10 modýlden, 20 sabaqtan jáne onlain tapsyrmalardan turady. Sabaq barysynda kýrs qatysýshylary biznesti qalai ashýǵa bolatynyn, qandai biznes ideianyń mańyzy joǵary ekenin, qarjylandyrý kózin qalai tabý kerektigin úirenip, marketing-menedjment negizderimen tanysady. Sonymen qatar qarjylyq-quqyqtyq aspektilerdiń túrli erekshelikterin úirenýge múmkindik alady.
«Jas Ka'sipker» kýrsyn aiaqtaǵan qatysýshy biznes-josparyn 22 qazanǵa deiin qurýy qajet. Ol úshin «Atameken.co» platformasynda tirkelip, kýrs stýdentteri úshin ashylǵan arnaiy telegram chatqa jazylýy tiis.
«Atameken» QR Ulttyq kásipkerler palatasy, Agrokredit korporatsiiasy, Aýyl sharýashylyǵyn qarjylai qoldaý qory men «Damý» kásipkerlikti damytý qorynyń menedjerleri kýrstyń sarapshylary retinde qatysady.
Kýrs sońynda stýdentter arasynda biznes-jospar qurý boiynsha baiqaý uiymdastyrylady. Basty syilyq – jobany júzege asyrýǵa beriletin 500 myń teńge kólemindegi birjolǵy grant. Sondai-aq eń kóp daýysqa ie bolǵan úzdik biznes-josparlardyń ishinde jubanysh syilyqtary da oinatylady. Máselen, biznes-tálimgerler keńes berip, joba boiynsha jarnamalyq rolik túsiriledi, veb-sait jasalyp, bizneske arnalǵan Brandbook qurastyrý múmkindigine ie bolady.
Aita ketsek, «Jas Ka’sipker» onlain-platformasy «Bastau-Business» bilim berý jobasynyń bir bóligi sanalady. Jobanyń basty mindeti «Tsifrly Qazaqstan» baǵdarlamasyn tiimdi júzege asyrý.
