Respýblikalyq biýdjette 2021 jylǵa Atyraý oblysynyń áleýmettik-ekonomikalyq damýy úshin 56,9 mlrd teńge somasynda shyǵystar kózdelgen.
Bul jaiynda senatorlardyń depýtattyq saýalyna QR Premer-Ministri Asqar Maminniń jaýabynda aitylǵan, dep habarlaidy "Ult aqparat".
«Jalpy sipattaǵy transfertterdi esepteý ádistemesin 2021-2023 jyldarǵa arnalǵan Atyraý oblysynyń damý biýdjetiniń jáne respýblikalyq biýdjetten beriletin transfertterdiń mólsherin ulǵaitý bóliginde qaita qaraýǵa qatysty sizderdiń saýaldaryńyzdy qarap, mynany habarlaimyn. 2020-2022 jyldarǵa arnalǵan alýlar kólemi Jalpy sipattaǵy transfertterdi esepteý ádistemesi boiynsha eseptelgen. Munda kórsetiletin qyzmetterdi tutynýshylar sanyna esepteý, óńirlik erekshelikter men erekshelikti eskeretin birqatar kórsetkishti qoldaný, sondai-aq jergilikti biýdjettiń kiristeri men shyǵystarynyń arasyndaǵy aiyrmashylyq negizgi qaǵidattar bolyp tabylady. Atyraý oblysy respýblikalyq biýdjettiń negizgi donorynyń biri ekeni ózderińizge belgili», - dedi Úkimet basshysy.
Onyń aitýynsha, 2019 jylmen salystyrǵanda (328,5 mlrd teńge) oblys biýdjetiniń kiristeri 2020 jyly 376,3 mlrd teńgege deiin ósti. Túsimderdiń jyl saiynǵy serpini aldyńǵy jylǵa qaraǵanda aitarlyqtai ósý qarqynyn kórsetýde. Mysaly 2019 jyly - 116,7 jáne 2020 jyly - 114,6 paiyz boldy.
«Alýlardyń 2020-2022 jyldarǵa ulǵaiýy kirister boiynsha boljamnyń ulǵaiýyna bailanysty. 2020-2022 jyldarǵa arnalǵan kiris kólemin boljaý kezinde shaǵyn jáne orta biznesten túsetin korporativtik tabys salyǵyn (budan ári – KTS) jáne benzindi kóterme saýdada ótkizýge arnalǵan aktsizderdiń ulǵaitylǵan mólsherlemesin qoldanýdan túsetin túsimder eskerildi. 2020 jyly Atyraý oblysynyń biýdjetine shaǵyn jáne orta biznesten KTS qoldaný esebinen 39,6 mlrd teńge tústi. Bul Qazaqstan Respýblikasy Úkimetiniń boljamynan 11,2 mlrd teńgege artyq. Budan basqa 2020-2022 jyldarǵa arnalǵan jalpy sipattaǵy transfertterdi esepteý kezinde Jalpy sipattaǵy transfertterdi esepteý ádistemesine jergilikti kiristerdiń ósý áleýetin eskeretin damý biýdjetiniń boljamyna yntalandyrýshy quraýyshty engizý bóliginde ózgerister engizildi», - dedi Premer-Ministr.
Asqar Maminniń atap ótýinshe, osynyń negizinde 2020 jyly 37,9 mlrd teńgeden 2022 jyly 49,0 mlrd teńgege deiin birtindep ulǵaitý maqsatynda Atyraý oblysynyń damý biýdjeti engizilgen. Respýblikalyq biýdjette 2021 jylǵa Atyraý oblysynyń áleýmettik-ekonomikalyq damýy úshin 56,9 mlrd teńge somasynda shyǵystar kózdelgen.
«Jalpy Qazaqstan Respýblikasynyń Úkimeti biýdjetaralyq qatynastardy jetildirý boiynsha jumystardy jalǵastyryp jatyr. Osylaisha qazirgi ýaqytta Jalpy sipattaǵy transfertterdi esepteý ádistemesin jetildirý boiynsha jumys júrgizilýde, munda jalpy sipattaǵy transfertterdi esepteý kezinde olardyń ózektiligi jáne halyqtyń ómir súrý deńgeiin arttyrýǵa baǵyttalǵan óńirlik erekshelik eskerile otyryp, qoldanylatyn kórsetkishter men koeffitsientter qaita qaralatyn bolady», - dedi ol.
