Qazaqstanda kóbine qandai ónimder zańsyz ainalymǵa shyǵady. Naryqtaǵy kontrafaktilik ónimder týraly «Kazpatent» direktory Erbol Ospanov aityp berdi, dep habarlaidy QazAqparat.
«Zańsyz ónim ainalymy farmatsevtika salasyn da ainalyp ótpedi. Ásirese, COVID-19-ǵa qatysty jalǵan dári-dármekter men meditsinalyq buiymdardyń taralýy ózekti bolyp otyr. Jalǵan dári-dármek kontrafaktilik taýarlardyń ishindegi eń ziiandysy ári qaýiptisi. Sońǵy jyldary dári-dármekti zańsyz óndirý, satý men tutynýdyń aitarlyqtai óskeni baiqalyp otyr. Mysaly, ótken jyly Almatyda Ekonomikalyq tergeý departamenti bógde taýar tańbasyn paidalana otyryp, oramasyn qoldan jasap, jaramdylyq merzimin ózgertý jolymen dárilik zattardy daiyndaý jónindegi jerasty tsehynyń qyzmetin anyqtap, toqtatty», - dedi Erbol Ospanov OKQ-de ótken baspasóz máslihatynda.
Onyń aitýynsha, búginde jalǵan ónim daiyndaityn tsehtardy anyqtap, qyzmetin toqtatý basty mindet bolyp otyr.
«Kontrafaktilik jaǵdai etek jaiyp otyrǵan taǵy bir sala – azyq-túlik. Jyl saiyn álemde myńdaǵan tutynýshy jalǵan tamaq satyp alady. Alaiaqtar taýardyń markirovasyn qate jazý jáne óndirilgen el boiynsha jalǵan aqparat berý arqyly ustalyp jatady. Bul árekettiń taǵy bir teris tusy baǵany jasandy ósirýge ákelip soqtyrady», - deidi ol.
