Halyqaralyq sharttar aiasynda shetelde oqý úshin úmitkerlerdi irikteýdiń barynsha ashyqtyǵy men aiqyndyǵyn qamtamasyz etý maqsatynda QR Bilim jáne ǵylym ministri A. Aimaǵambetovtiń tapsyrmasyna sáikes «Shetelde, onyń ishinde akademiialyq oralymdylyq sheńberinde oqytýǵa jiberý qaǵidalaryna» birqatar ózgerister men tolyqtyrýlar engizildi. Bul jóninde halyqaralyq baǵdarlamalar ortalyǵyna silteme jasap "Ult aqparat" habarlaidy.
Atap óterligi, engizilgen túzetýlerge sáikes, qaǵidada shetelde oqityn úmitkerlerdi irikteý kezinde teń ball ielengender úshin kelesi basymdyqtar basshylyqqa alynady:
1) jetim balalar men ata-anasynyń qamqorlyǵynsyz qalǵan balalar;
2) bala kezinen múgedekter jáne múgedek balalar;
3) kópbalaly otbasynan shyqqan balalar;
4) sheteldik joǵary oqý oryndarynan shaqyrtýy bar, sondai-aq sheteldik joǵary oqý oryndarynda oqityn úmitkerler.
Adami faktorǵa bailanysty táýekelderdi tómendetý maqsatynda qujat qabyldaý avtomattandyryldy jáne «elektrondy úkimet» veb-portaly arqyly júzege asyrylady.
Obektivti sheshim qabyldaýdy qamtamasyz etý úshin endi jańa Qaǵidaǵa sáikes irikteý eki kezeńnen turady: Táýelsiz saraptama komissiiasynyń múshelerimen suhbat jáne Qorytyndy komissiianyń sheshim qabyldaýy. Suraqtar bekitilgen reglament boiynsha qoiylady.
Sonymen qatar, konkýrs jeńimpazdarymen oqýdy aiaqtaǵannan keiin 3 (úsh) jyl merzimge Qazaqstan Respýblikasynyń aýmaǵynda úzdiksiz eńbek qyzmetin mindetteitin oqýǵa shart jasasý boiynsha norma engizildi.
Shetelde, sonyń ishinde akademiialyq oralymdylyq sheńberinde oqytýǵa jiberý qaǵidalarynyń tolyq mátinimen myna siltemede tanysýǵa bolady.
