Foto: Sputnik.kz
Ǵylym jáne joǵary bilim ministri Saiasat Nurbek UBT mazmuny men ádistemesi tolyǵymen qaita jańǵyrtylatynyn aitty, dep habarlaidy Ult.kz.
Ministr eń aldymen Prezidenttiń AQSh-taǵy mańyzdy kezdesýlerine toqtaldy.
"Qazaqstandyq antropologtar álemniń eń kóne ǵylymi ortalyǵynda bilim ala alady. Memleket basshysynyń sapary aiasynda ǵylym men joǵary bilimdi damytýǵa arnalǵan eki mańyzdy kezdesý ótti. Prezident AQSh-taǵy eń kóne ǵylymi-zertteý ortalyqtarynyń biri sanalatyn Smitson institýtynyń basshylyǵymen kelissózder júrgizdi. "Bolashaq" baǵdarlamasy aiasynda qazaqstandyq jetekshi ǵalymdar, antropologtar, mádeniettanýshylar men tarihshylar osy bedeldi ǵylymi-zertteý ortalyǵynda arnaiy bilim alý múmkindigine ie bolady", – dep jazdy Saiasat Nurbek.
Kelesi mańyzdy jańalyq UBT-ǵa qatysty boldy.
"Educational Testing Service (ETS) kompaniiasy – álemdegi testologiia salasyndaǵy eń kóne uiym. Kelissózder nátijesinde ETS-tiń jetekshi mamandary qatysatyn arnaiy jumys toby qurylady. Halyqaralyq deńgeidegi sarapshylardyń tájiribesi negizinde Qazaqstandaǵy Ulttyq biryńǵai testileýdiń mazmuny men ádistemesi tereń jańǵyrtylyp, ol zamanaýi ádisteme men baǵalaýdyń sapasy joǵary halyqaralyq standartqa sai jetildirilmek", – dep atap ótti ministr.
Onyń sózinshe, UBT sapasyn kúrt ózgertý, mazmunyn tolyqqandy qarastyrý baǵytyndaǵy jumys osy ǵylymi ortalyqpen birlesip júrgiziledi. Saiasat Nurbek kelesi aida zertteýshiler delegatsiiasy elimizge keletinin habarlady.
Aita ketý kerek, buǵan deiin Prezident Qasym-Jomart Toqaevtyń Niý-Iorkke jumys sapary bastaldy.
