© Sputnik / Timýr Batyrshin
Bas áskeri prokýrordyń birinshi orynbasary Maqsat Qaziev elimizdegi áskeriler arasyndaǵy sýitsid máselesine qatysty túsinik berdi, dep habarlaidy QazAqparat.
«2020 jyldan bastap elimizde 270 áskeri qyzmetshi qaitys boldy: 2020 jyly – 78 áskeri qyzmetshi, 2021 jyly – 96, 2022 jyly – 85, 2023 jyly – 11. Ólim jaǵdailarynyń eń kóp taraǵan sebepterine toqtalsaq, aýyryp qaitys bolý – 36%, kólik apatynyń saldary – 24%, sýitsid – 20%.
Alaida óz-ózine qol salý jaǵdaiy bárimizdi alańdatyp otyr. Sýitsid profilaktikasyn taldaý nátijesi áskerimizdiń qoǵamnyń bir bóligi retinde jaǵymsyz jaǵdaiǵa táýekeli baryn kórsetti», - dedi Qaziev Senatta áskeri qyzmetshilerdiń densaýlyǵyna qatysty máseleni talqalaý kezinde.
Onyń aitýynsha, túrli málimetterge sáikes, halyq arasyndaǵy sýitsid deńgeii boiynsha Qazaqstan álem elderi arasynda 20-orynda, al jasóspirimder arasynda úshtikke kiredi.
«Quqyqtyq statistika komitetiniń málimetinshe, 2018-2022 jyldary elde 17 631 sýitsid jáne 21 332 ózine qol salýǵa oqtalý jaǵdaiy tirkelgen, iaǵni 10 000 azamatqa shaqqanda 9 sýitsid jáne 11 óz-ózine qol salýǵa talpyný áreketi tirkelip otyr. Olardyń arasynda 86 sýitsid jáne ózine qol salýǵa oqtalýdyń 20 deregi áskerde bolǵan. Iaǵni 10 myń áskeri qyzmetshige shaqqanda 6 sýitsid jáne 1 óz-ózine qol salýǵa oqtalý áreketinen keledi. Demek, qoǵamdaǵy óz-ózine qol salý kóbinese áskerde bolady degen pikir resmi málimettermen rastalmai otyr. Bul rette densaýlyqty qorǵaý men profilaktikasy boiynsha ýákiletti organ Densaýlyq saqtaý ministrligi ekenin atap ótken jón», - dedi Maqsat Qaziev.
Budan buryn habarlanǵandai, DDSU statistikasyna sáikes, Qazaqstan sýitsid sany boiynsha 20-orynda tur.
