Indýstriialyq ortalyqtar ainalasynda shaǵyn jáne orta kásiporyndar beldeýi qurylady. Bul týraly búgin Úkimet otyrysynda QR Indýstriia jáne infraqurylymdyq damý ministri Beibit Atamqulov aitty, dep habarlaidy QazAqparat.
«Tústi metallýrgiiada 2021 jylǵa josparly kórsetkish - 104,5 paiyz. Myrysh óndirý kólemi 18,6, qorǵasyn 18,8, mys kontsentraty 9, aliýminii 6 paiyz ulǵaitylady. Bloomberg boljamyna qarasaq, qysqa merzimdi perspektivada tústi metaldardyń barlyq túri boiynsha baǵa kóterilýi tiis. Osyǵan bailanysty nominaldy mánde tústi metallýrgiia óndirisiniń ósimi 13 paiyz deńgeiinde boljanyp otyr. Bul óndiristiń josparlanǵan kólemin qamtamasyz etedi», - dedi óńdeý ónerkásibin damytý jaiynda baiandaǵan ministr.
Beibit Atamqulovtyń aitýynsha, Jáirem ken baiytý kásiporny, Kazminerals Aqtoǵai 2 jáne Sátbaev taý-ken baiytý kásiporny, sondai-aq altyn shyǵarý fabrikalary óndiristiń qosymsha kólemin beretin bolady.
«Iri taý-ken metallýrgiia kásiporyndarynyń suranysyna bailanysty klasterlik tásilmen indýstriialyq ortalyqtar ainalasynda shaǵyn jáne orta kásiporyndar beldeýin qurý jumysy júrgiziledi. 2025 jylǵa deiingi merzimde Almaty oblysynda Kóksai mys ken ornyn igerý jobasy iske asyrylady jáne qýaty 250 myń tonna bastapqy aliýminii bolatyn Pavlodar qalasyndaǵy «Qazaqstandyq elektroliz zaýytynyń» ekinshi kezegi salynady», - dedi ol.
