Parlament Senatynyń jalpy otyrysynda «Qazaqstan Respýblikasynyń keibir zańnamalyq aktilerine Qazaqstan Respýblikasynda banktik, mikroqarjylyq jáne kollektorlyq qyzmetti retteý máseleleri boiynsha ózgerister men tolyqtyrýlar engizý týraly» Zańy eki oqylymda qaralyp, qabyldandy, dep habarlaidy "Ult aqparat".
Kollektorlyq agenttikterdiń keibir negizsiz árekteterine tosqaýyl qoiylmaq. Búgin senatorlar qabyldaǵan zań olarǵa bógde adamdardyń telefon nómirlerinen boryshkerlerge habarlasýǵa tyiym salady. Odan basqa, agenttikter boryshkermen sóilesýdiń kez kelgen protsesine beine jáne aýdio túrinde jazba júrgizýge mindetti bolady.
Palata depýtattarynyń pikirinshe, bul norma kollektorlar tarapynan dóreki sóilesý nemese zańnamany buzýdan saqtaidy.
Sonymen qatar, nesie tarihyna qatysty ózgeris engizildi. Eger buryn ondai tarihty saqtaý merzimi 10 jyl bolsa, búginde qabyldanǵan túzetýlerge sáikes bul merzim 5 jylǵa deiin qysqarady.
«Azamattardyń nesie tarihyn saqtaý merzimi de mańyzdy másele bolyp otyr. Bankter ótken 10 jylda qaryz tólemderiniń merzimin ótkizip alǵan adamdarǵa kredit berýden bas tartady. Nesie tarihyn saqtaý merzimi 10 jyldan 5 jylǵa deiin qysqarǵanda bizdegi 490 myńǵa jýyq otandasymyz qajet bolǵan jaǵdaida bankter men mikroqarjy uiymdarynan nesie alýǵa múmkindik alady», - dedi senator Olga Perepechina.
Zańda bank qaryzdary men mikrokreditter boiynsha problemaly bereshekterdi sotqa deiin retteý tetikteri de jetildirildi. Endi merzimi ótken kreditter boiynsha bereshekti retteýdiń biryńǵai quqyqtyq tártibi kózdelip otyr, ol bankterdiń qaryzdaryna ǵana emes, sondai-aq mikroqarjy uiymdarynyń kreditterine de qoldanylady. Sondai-aq qaryz alýshylardyń kreditorlarǵa ótinishterin qaraý merzimi 180 kúnnen 90 kúnge deiin qysqartyldy.
Aita keteiik, biyl naýryzda Parlament Májilisi «Qazaqstan Respýblikasynyń keibir zańnamalyq aktilerine Qazaqstan Respýblikasynda mikroqarjylyq jáne kollektorlyq qyzmetti retteý máseleleri boiynsha ózgerister men tolyqtyrýlar engizý týraly» zań jobasy ekinshi oqylymda maquldaǵan bolatyn.
