«Jolaýshylar tasymaly» AQ resmi ókili Dias Ahmetshárip poiyz biletteriniń baǵasy týraly aitty, dep habarlaidy QazAqparat.
«Biz, ulttyq tasymaldaýshy retinde, Qazaqstandaǵy barlyq tasymal boiynsha qajettiliktiń 80 paiyzyn jaýyp otyrmyz. Qalǵan 20 paiyz - jeke kompaniialar úlesinde. Biz jyl saiyn 120 baǵdar boiynsha qyzmet kórsetemiz. Onyń 50 baǵyty - jolaýshylar tasymaly. 70 baǵdar - qala mańyndaǵy tasymal. 50 marshrýttyń ishinde bizde 39-nyń áleýmettik mańyzy bar. 11 - kommertsiialyq baǵdar jumys istep tur. Indýstriia jáne infraqurylymdyq damý ministrligi arqyly jasalǵan áleýmettik mańyzy bar baǵyttar boiynsha uzaq merzimdi sýbsidiialaý týraly kelisim bar. Osy kelisimge sáikes biz jyl saiyn áleýmettik mańyzy bar baǵdarlardyń tarifterin kóteremiz. Óitkeni olar memleket tarapynan sýbsidiialanady», - dedi Dias Ahmetshárip elordada ótken baspasóz máslihatynda.
Kompaniianyń resmi ókili sondai-aq, biyl qansha baǵdar boiynsha baǵanyń kóterilgenin aityp ótti.
«Osy jyly bizdiń baǵalarymyz kóterilgen joq. Tek qyrkúiekte esep beremiz. Al quzyrly organdar tarifterdi kóterý týraly hat jiberedi. Bizde áleýmettik mańyzy bar 28 baǵdar úshin tarif 10 paiyzǵa ósti. Bul jyl saiynǵy protsedýra», - dedi Dias Ahmetshárip.
