Qazaqstanda zorlyq-zombylyq pen pedofiliia qylmysy úshin jaza kúsheitildi. Bul týraly QR Bas Prokýrorynyń orynbasary Marat Ahmetjanov málimdedi, dep habarlaidy QazAqparat.
Spikerdiń aitýynsha, Memleket basshysy qol qoiǵan Qylmystyq, qylmystyq-protsestik zańnamany jetildirý boiynsha QR Zańy arqyly zorlaý (Qylmystyq kodekstiń 120-baby) jáne nápsiqumarlyq sipattaǵy kúsh qoldaný áreketteri (QK 121-b.) ortashadan aýyr sanatqa aýystyryldy (QK 120-babynyń 1-bóligi, 121-babynyń 1-bóligi – 5 jyldan 8 jylǵa deiin bas bostandyǵynan aiyrý).
«Buǵan deiin zorlaý qylmysy ortasha sanatta boldy jáne qos taraptyń ymyraǵa kelýine, isti sotqa jetkizbeýge múmkindik beriletin. Endi bul sanattaǵy qylmys boiynsha mámilege kelýge tyiym salynady», - dedi Marat Ahmetjanov QR Prezidenti janyndaǵy Ortalyq kommýnikatsiialar qyzmetinde ótken baspasóz máslihatynda.
«Jas balaǵa qatysty zorlaý nemese nápsiqumarlyq sipattaǵy kúsh qoldaný áreketterin jasaǵany úshin (Qylmystyq kodekstiń 120-babynyń 4-bóligi, 121-baby) 20 jylǵa nemese ómir boiyna bas bostandyǵynan aiyrý jazasy ǵana kózdelgen. Jas balalardy óltirgeni úshin de osyndai jaza beriledi. Endi pedofiliia faktilerin habarlamaǵany, jasyrǵany jáne burmalaǵany úshin (QK 416, 432, 434-baptary) jazanyń eń joǵary merzimi - 6 jylǵa deiin bas bostandyǵynan aiyrý», - dedi Marat Ahmetjanov.
Aita keteiik, Marat Ahmetjanov elimizdegi qylmys ahýaly týraly, sondai-aq qylmystyq, qylmystyq-protsestik zańnamany jetildirý boiynsha QR Zańynyń negizgi novellalary týraly aityp berdi. Atalǵan zańǵa QR Prezidenti 2019 jyldyń 28 jeltoqsanynda qol qoidy jáne 2020 jyldyń 1 qańtaryna kúshine enedi.
