Elimizde ónerkásiptik grant engiziledi. Bul týraly QR Parlamenti Senatynyń jalpy otyrysynda QR Indýstriia jáne infraqurylymdyq damý ministri Beibit Atamqulov aitty, dep habarlaidy QazAqparat.
Otyrysta «Ónerkásiptik saiasat týraly» jáne oǵan ilespe zań jobasy týraly baiandama jasaǵan ministri óndiris protsesine qatysty tyń jańalyqtarmen bólisti.
«Birinshi, yntalandyrýdyń jańa quraly - ónerkásiptik grant engizilýde. Ol birge qarjylandyrý negizinde óndiristi tehnologiialyq jańǵyrtýǵa beriledi. Ekinshi, memlekettik yntalandyrýdyń barlyq is-sharasy orta jáne joǵary bólinistegi ónim óndirýshilerge beriledi. Ádisteme negizinde ónimniń tiisti tizbesi bekitiledi. Osylaisha, qaita óńdeýdi tereńdetýge nazar aýdarylady», - dedi ol.
Onyń atap ótýinshe, úshinshi, kórsetiletin is-sharalardyń tiimdiligin arttyrý úshin qarsy mindettemeler engiziledi. Olar biznestiń alyp otyrǵan is-sharalarynyń túri men kólemin eskere otyryp aiqyndalady. Kásiporyn mindettemelerdi oryndamaǵan jaǵdaida olardy oryndaý deńgeiine qarai biýdjet qarajatyn qaitarýy tiis. Tórtinshi, básekege qabilettilikti arttyrý týraly kelisim engiziledi. Ol yntalandyrý is-sharalarynyń aralas paketin alýǵa múmkindik beredi. Besinshi, Ónerkásipti damytý qorynyń 3 paiyzdyq jeńildetilgen qarjy berý fýnktsiiasy kózdelgen. Al naryqta investitsiialyq jobalardy nesieleý mólsherlemesi 6 paiyz jáne odan joǵary.
«Altynshy - tsifrlyq transformatsiialaý. Biz Germaniianyń Fraýnhofer institýtymen birlesip, júiequraýshy kásiporyndarǵa taldaý jasadyq. Olardyń árqaisysy tsifrlyq transformatsiianyń qai kezeńinde ekenin baǵaladyq. Kásiporyndarǵa tsifrlyq transformatsiia júrgizý úshin qyzmetkerleriniń biliktiligin arttyrý jáne sheteldik mamandardy tartý, basqarýdyń jańa ádisterin engizý tetikteri kózdelgen. Jetinshi, jyldan jylǵa usynylatyn memlekettik yntalandyrý is-sharalarynyń tizbesi keńeiýde. Bul óz kezeginde biznes úshin qolaily jaǵdailar jasaýdy talap etedi. Sondyqtan barlyq yntalandyrý is-sharalary «Elektrondyq úkimet» veb-portaly arqyly «bir tereze» qaǵidaty arqyly júzege asyrylady. Bizdiń ministrlik yntalandyrý is-sharalary boiynsha úilestirýshi memlekettik organ bolady», - dedi Beibit Atamqulov.
