Energetika ministri Maǵzum Myrzaǵaliev Atyraý munai óńdeý zaýytynda dizel otynymen qamtamasyz etý máseleleri boiynsha keńes ótkizdi. Vedomstvo basshysyna ishki naryqtaǵy aǵymdaǵy jaǵdai týraly baiandaldy, dep habarlaidy "Ult aqparat" Qazaqstan Respýblikasy Energetika ministrliginiń baspasóz qyzmetine silteme jasap.
«QazMunaiGaz» UK AQ derekteri boiynsha otandyq munai óńdeý zaýyttary barynsha júktelgen. Munai ónimderiniń negizgi túrleri bekitilgen jospardan asyra óndirilýde.
«Aita ketý kerek, tamyz-qyrkúiek ailarynda Qazaqstanda dizel otynyn normadan tys joǵary tutynýy tirkeldi. Bunyń sebebi, dizel otynynyń baǵasy tómen bolǵandyqtan, onyń tranzittik júk kólikterimen aǵyny oryn aldy. Búgingi tańda osy jaǵdai qolmen basqarý rejimine kóshti. Energetika ministrligi naryqty tez arada turaqtandyrý jáne sapaly otynmen qamtamasyz etý mindetin qoidy. Kún saiyn Shymkent zaýytynda shamamen 5,5 myń tonna dizel otyny, Atyraý zaýytynda 4,4 myń tonnaǵa jýyq dizel otyny óndiriledi», – dep habarlady ulttyq kompaniia basqarmasy tóraǵasynyń orynbasary Daniiar Tiesov.
14 kún ishinde eki zaýyt 133 myń tonna dizel otynyn óndirdi, bul josparly kórsetkishterden 4 myń tonnaǵa artyq. Aǵymdaǵy jyldyń 9 aiynda úsh MÓZ-de barlyǵy 3,7 mln. tonna dizel otyny óndirildi.
Sonymen qatar D. Tiesov qyrkúiek aiynda egin jinaý naýqanyna ótinimder tolyǵymen jabylǵanyn, olarǵa dizel otyny jeńildikpen satylǵandyǵyn atap ótti.
Sondai-aq kezdesý barysynda basqarma basshysyna munai ónimderi naryǵyndaǵy qalyptasqan jaǵdaiǵa bailanysty Atyraý munai óńdeý zaýytyn jóndeýdi kelesi jylǵa aýystyrý týraly sheshim qabyldanǵanyn habarlady.
Aǵymdaǵy jyldyń 9 aiynda AMÓZ 4 006 000 tonna munai óńdep, 1 168 276 tonna dizel otyny, 935 738 tonna avtomobil benzinin óndirip shyǵardy.
Óz kezeginde Energetika ministri munai óńdeýshi kompaniialardyń basshylarynan kásiporyndardyń úzdiksiz jumysyn qamtamasyz etýdi talap etti.
«MÓZ» basshylyǵy men ujymynyń birinshi kezektegi mindeti zaýyttyń senimdi jáne turaqty jumys isteýi bolyp tabylatynyn erekshe atap ótkim keledi. Zaýyttyń isten shyǵýyna ártúrli sebepterdi aitýǵa bolady. Alaida elimizde mundai jaǵdai endi qaitalanbaýy tiis», - dedi Maǵzum Myrzaǵaliev.
Basqarma basshysy avtojanarmai quiý stantsisynda satylatyn dizel otynynyń sapasyna da toqtaldy.
«QazMunaiGazdan» barlyq jetkizý tizbegi boiynsha: MÓZ-den AJQS-qa deiin janar-jaǵarmai materialdarynyń sapasyn baqylaý júiesi boiynsha usynystar engizýdi suraimyn», - dep qorytyndylady ministr.
Keńes qorytyndysy boiynsha Maǵzum Myrzaǵaliev ulttyq kompaniiaǵa barlyq MÓZ-diń turaqty jumys isteýin, sondai-aq Atyraý MÓZ-ine elektr energiiasyn úzdiksiz jetkizý boiynsha sharalardy turaqty baqylaýda ustaýdy tapsyrdy.
