Qazaqstanda meditsinalyq aviatsiiada jańa úlgidegi ushaqtarǵa ruqsat berilmek. Bul jaiynda senatorlardyń depýtattyq saýalyna QR Premer-Ministri Asqar Maminniń jaýabynda aitylǵan, dep habarlaidy "Ult aqparat".
«Meditsinalyq aviatsiia qyzmeti – jol-kólik oqiǵalarynyń saldarynan bolatyn ólimdi tómendetýge, akýsherlik patologiiasy bar áielderge, týa bitken damý kemistigi bar balalarǵa, qan ainalymy júiesi aýrýlary bar patsientterge jáne basqa da shuǵyl meditsinalyq kómek kórsetýge baǵyttalǵan. Densaýlyq saqtaý ministrligi meditsinalyq aviatsiiaǵa beiimdelgen qazirgi zamanǵy áýe kemelerin (meditsinalyq modýlmen jabdyqtalǵan) tartý jáne ushýdyń jańa baǵyttaryn (áýe jelilerin) qurý, qolda bar borttardyń tehnikalyq quramyn jaqsartý úshin aviatsiialyq qyzmetterge tarifterdi ulǵaitý máselesin pysyqtaýda. Osy maqsatta 5,4 mlrd teńge somasyna qosymsha qajettilikke biýdjettik ótinim ázirlendi. Ol 2021 jylǵa arnalǵan respýblikalyq biýdjetti naqtylaý kezinde zańnamada belgilengen tártippen qaralatyn bolady, - dedi Asqar Mamin.
Úkimet basshysynyń jaýabyna qosa berilgen anyqtamaǵa sáikes, el ishindegi aviatsiialyq qyzmetterge qatysty kelesi tarifterdi ulǵaitý kózdelýde:
- AN-2 ushaǵynyń qyzmeti (17 birlik) – tarif 1 saǵat úshin 270 000 teńgeden 328 000 teńgege deiin;
- AN-24 ushaǵynyń qyzmeti (1 birlik) - tarif 1 saǵat úshin 896 000 teńgeden 1 087 000 teńgege deiin;
- IaK-40 (2 birlik) ushaǵynyń qyzmeti – tarif 1 saǵat úshin 1 091 950 teńgeden 1 328 000 teńgege deiin;
- Pilatus PC-12, Piaggio Avanti EVO úlgisindegi jańa áýe kemesin paidalanýǵa ruqsat etý (tarif – 1 saǵat úshin 1750 000 teńge);
- TwinOtter 400, L-410-250 úlgisindegi jańa áýe kemesin paidalanýǵa ruqsat etý (tarif – 1 saǵat úshin 760 000 teńge);
- Hawker 800/900, Dornier-328, Bombardier CRJ-200, Pilatus PC-24-350 úlgisindegi jańa áýe kemesin paidalanýǵa ruqsat etý (tarif – 1 saǵat úshin 2 120 000 teńge).
«Sonymen qatar, Densaýlyq saqtaý ministrligi memlekettik tapsyrmany oryndaý aiasynda «Ulttyq shuǵyl meditsinany úilestirý ortalyǵy» respýblikalyq memlekettik kásiporynynan qosalqy merdigerge bólinetin biýdjet qarajatynyń úlesin ulǵaitýǵa qatysty Biýdjet kodeksine ózgerister engizý máselesin belgilengen tártippen pysyqtaýda», - dedi Premer-Ministr.
