Endigi ýaqytta memlekettik tapsyrys aiasynda salynatyn qurylys jobalarynyń quny onlain kalkýliator arqyly aldyn ala eseptelip, quny belgilenedi. Qurylys salasyndaǵy atalǵan jańa qyzmet týraly QR Indýstriia jáne infraqurylymdyq damý ministrliginiń birinshi vitse-ministri Qaiyrbek Óskenbaev aityp berdi, dep habarlaidy QazAqparat.
«Qurylys salasyndaǵy jumystyń ashyqtyǵyn tsifrlandyrý arqyly ǵana qamtamasyz ete alamyz. Osy oraida biz elimizdegi qurylys salasyn jobalaýdan bastap, qoldanysqa berýge deiingi protsesti tolyqtai avtomattandyrýmen ainalysyp jatyrmyz. Mysaly, halyq bizden suraidy nege jobasy, qurylys materialy birdei nysandardyń baǵasy ár óńirde ártúrli. Osy máseleni retteý maqsatynda, memlekettik saraptaý aiasynda qurylys salasynda onlain kalkýliatordy iske qostyq. Endigi ýaqytta tapsyrys berýshi onlain kalkýliatorǵa jańa qurylys nysanynyń barlyq kórsetkishterin engizedi, al kalkýliator avtomatty túrde jobanyń qunyn shyǵaryp beredi. Osylaisha qurylys jobasyn ázirleý kezinde baǵany ósirý nemese ózgertý múmkin bolmaidy. Iaǵni joba avtory qurylys nysanyn josparlaý barysynda artyq qadamǵa bara almaidy», - dedi Óskenbaev baspasóz máslihatynda.
Vitse-ministrdiń sózine sensek, onlain kalkýliator qurylys obektisiniń shekti qunyn jyldam esepteýge múmkindik beredi jáne ol memlekettik saraptama portalynda tirkelip, bekitilgen.
