1,9 myńnan astam meditsina qyzmetkeri COVID-19 infektsiiasyn jáne pnevmoniiany juqtyrýyna bailanysty tólem aldy, dep habarlaidy "Ult aqparat".
QR Eńbek jáne halyqty áleýmettik qorǵaý ministrligiinń málimetinshe, COVID-19-ben kúresýge tartylǵan 1 965 meditsina qyzmetkeri koronavirýs infektsiiasyn nemese virýsty pnevmoniiany juqtyrǵan jaǵdaida memlekettik áleýmettik saqtandyrý qorynan beriletin birjolǵy áleýmettik tólemdi alǵan. Sondai-aq, MÁSQ aýrýdyń saldarynan qaitys bolǵan 26 meditsina qyzmetkeriniń týystaryna ótemaqy aýdardy.
Budan buryn habarlanǵandai, joǵaryda atalǵan tólem tólenetin meditsina qyzmetkerlerin óńirlerdiń jáne respýblikalyq mańyzy bar qalalardyń densaýlyq saqtaý basqarmalary janyndaǵy arnaiy komissiialar aýyrǵan meditsina qyzmetkerlerin tekserý nátijesi negizinde anyqtaidy.
Ótinimderdi QR Densaýlyq saqtaý ministrligi jinaidy. Odan keiin ótinim elektrondyq is maketterin qalyptastyrý úshin «Azamattarǵa arnalǵan úkimet» memlekettik korporatsiiasyna beriledi, keiin tólem taǵaiyndaý úshin MÁSQ-ǵa jiberiledi.
Óńirler bólinisinde meditsina qyzmetkerlerine COVID-19 nemese virýstyq pnevmoniiany juqtyrý jaǵdaiyna tólemderdiń eń kóbi Nur-Sultan (502) jáne Almaty (373), Shymkent (117) qalalary, Qaraǵandy (138), Batys Qazaqstan (115) jáne Aqmola (107) oblystarynda.
Esterińizge sala keteiik, joǵaryda kórsetilgen tólem:
– koronavirýs nemese virýsty pnevmoniia juqtyrǵan meditsina qyzmetkerlerine – 2 mln teńge;
– COVID-19 infektsiiasyn juqtyrǵannan, virýsty pnevmoniiamen aýyryp qaitys bolǵan jaǵdaida olardyń otbasyna – 10 mln teńge kóleminde tólenedi.
