Búgin Senattyń jalpy otyrysynda «Qazaqstan Respýblikasynyń keibir zańnamalyq aktilerine kedendik retteý jáne kásipkerlik qyzmet máseleleri boiynsha ózgerister men tolyqtyrýlar engizý týraly» Zańy eki oqylymda qaralyp, qabyldandy, dep habarlaidy "Ult aqparat"..
Bul zańǵa Parlament depýtattary bastamashy bolǵanyn atap ótken jón. Senat tóraǵasy Máýlen Áshimbaevtyń aitýynsha, qabyldanǵan zań kedendik rásimderdi ótkizý merzimderi men tártibin ońtailandyrýǵa, kedendik retteýdi jetildirýge jáne biznes ahýaldy jaqsartýǵa baǵyttalǵan.
«Osy zań adamnyń qatysýyn barynsha azaityp, sybailas jemqorlyq táýekelderin tómendetýge jáne qujat ainalymyn azaitý úshin kedendik aqparattyq bazanyń qyzmeti men «Biryńǵai tereze» júiesi jetildirýge múmkindik beredi. Sondai-aq syrtqy ekonomikalyq qyzmetke qatysýshylardyń ótinishterin qaraý jáne sol boiynsha sheshim qabyldaý merzimderin qysqartýǵa jaǵdai jasaidy. Sonymen qatar kameralyq jáne kóshpeli kedendik tekseris júrgizý rásimi qaita qaralady. Aldaǵy ýaqytta zań kedendik retteýdi jetildirýge úlesin qosady dep senemiz», – dedi Palata Spikeri.
Senat depýtaty Dáýren Ádilbekovtiń sózine qaraǵanda, zań jobasy osy
keden isi salasyndaǵy memlekettik qyzmetterdi elektrondyq formatqa kóshirý jáne osynyń esebinen kedendik rásimderdi ońailatýǵa, sybailas jemqorlyq kórinisterin barynsha azaitýǵa baǵyttalǵan.
Atalǵan zań jobasy boiynsha Parlament depýtattary myndai ózgerister men tolyqtyrýlarǵa bastamashylyq jasady:
- «Bir tereze» qaǵidaty boiynsha memlekettik qyzmetter kórsetý merzimderin edáýir qysqartý;
- Syrtqy ekonomikalyq qyzmetke qatysýshylardyń ártúrli sanattaryn elektrondyq formatqa aýdarý;
- kameraldyq kedendik tekserýdi júrgizý tártibin reglamentteý jáne onyń merzimderin 6 aidan 2 aiǵa deiin qysqartý;
- tekseriletin tulǵanyń ornalasqan jeri boiynsha keden organynyń kóshpeli kedendik tekserýler júrgizýine shekteýler engizý;
- tóleýshilerge bereshekti óteý týraly habarlamany jiberý merzimin 15-ten 5 jumys kúnine deiin qysqartý;
- keden organdaryna úshinshi elderden ótkiziletin taýarlardy ǵana emes, Eýraziialyq ekonomikalyq odaq elderinen ótkiziletin taýarlardy da synyptaý boiynsha qyzmetter kórsetý bóliginde qosymsha fýnktsiialar berý.
