Qazaqstanda qaldyqtardyń jikteýdiń jańa tetigi engizilmek. Bul týraly QR Ekologiia, geologiia jáne tabiǵi resýrstar ministri Maǵzum Myrzaǵaliev málim etti, dep habarlaidy QazAqparat.
«Ekologiialyq kodekstiń jańa redaktsiiasynda qaldyqtar qaýiptiliginiń 3 deńgeiinen bas tartyp, Eýropalyq qaldyqtar katalogyna kóshý usynylady. Qoldanystaǵy qaldyqtar jiktemesiniń kemshiligine toqtalsaq, uqsas qaldyqtar kodirovkasynda ártúrli túsinik berý múmkindigi bar. Mysaly, kúldi qaýiptiliktiń jasyl (kómirde jumys isteitin energoqondyrǵylardan ushatyn kúl), sondai-aq qyzyl deńgeiine (kúl jáne qaldyqtar) jatqyzýǵa bolady», - dedi ministr Májiliste jańa Ekologiialyq kodeks jobasyn tanystyra otyryp.
Eýropalyq qaldyqtar katalogyna negizdelip usynylyp otyrǵan synyptaýyshtyń artyqshylyǵy - ol qaldyqtardy qaýiptilerge jáne qaýipsizderge bólý.
«Óndiris jáne tutyný qaldyqtaryn basqarýdy jetildirý boiynsha usynylyp otyrǵan sharalar túpkilikti nátijede stihiialyq qoqys oryndaryn joiýǵa, poligondar salýǵa arnalǵan biýdjet shyǵystaryn qysqartýǵa, sondai-aq ekologiiaǵa jáne adam densaýlyǵyna teris áserin azaitýǵa múmkindik beredi», - dedi Myrzaǵaliev.
