Qazaqstanda jyl ótken saiyn elektrondy tólem artyp keledi. Elimizde 2019 jylǵy 6 aidyń qorytyndysy boiynsha, 3 trln. teńgege qolma-qol aqysyz tólem jasalǵan. Bul ótken jylmen salystyrǵanda 3 ese kóp.
Onlain-tólem jasaý boiynsha Almaty qalasy kósh basynda (3,3 trln. Teńge). Byltyr óńirdegi bul kórsetkish 1,4 trln. teńgeni kórsetken edi. Odan keiingi oryndy Nur-Sultan qalasy alady, jalpy soma – 408,2 mlrd. teńge. Al ótken jyly elordalyqtardyń internet arqyly jasaǵan aqsha aýdarymy 198,3 mlrd. teńge bolǵan. Almaty oblysy turǵyndary da elektrondy tólem júiesin kóbirek qoldanǵan. Naqty aitqanda, 218,4 mlrd. teńge qolma-qol aqysyz aýdarylǵan.
Mamandardyń aitýynsha, elektrondy kommertsiianyń damýy – kóleńkeli biznespen kúrestiń taptyrmas joly. Ol úshin saýda naryǵyn modernizatsiialaý qajet. Osylaisha, kezeń-kezeńimen barlyq statsionarlyq emes naryq zamanaýi saýda formatyna kóshedi. Qazirgi tańda elektrondy kommertsiiany damytý baǵytynda birqatar jumystar atqarylyp jatyr.
QR Saýda jáne integratsiia ministrliginiń málimetinshe, saýdanyń 40 paiyzy kóleńkeli jolmen júzege asady, iaǵni tiisti salyqty tólemeidi. Osyǵan bailanysty elektrondy kommertsiiany damytýdyń 2019-2025 jyldarǵa arnalǵan Jol kartasy bekitildi. Baǵdarlama ishki elektrondy saýdaǵa jáne eksportqa arnalǵan. Nátijesinde, 2025 jylǵa qarai elektrondy saýdadaǵy bólshek saýdanyń úlesi 5 paiyzǵa artady.
Aita ketsek, «Tsifrlyq Qazaqstan» memlekettik baǵdarlamasyndaǵy basym baǵyttardyń biri – qarjylyq tehnologiialardy jáne qolma-qol aqshasyz júielerdi damytý. Josparǵa sáikes, 2022 jylǵa deiin belsendi qarjylyq qoǵamdastyq qalyptasatyn bolady. Sonymen qatar, elektrondyq tólemderdi arttyrý aiasynda álemniń ozyq tájiribeleri eskerilip, mobildik tólemderdi júzege asyrýdyń ońailatylǵan júiesi engiziledi.
