QR DSM sanitarlyq-epidemiologiialyq baqylaý komiteti tóraǵasynyń orynbasary Nurlybek Asylbekov elimizdegi dárilik zattardyń qoryna qatysty túsinik berdi, dep habarlaidy QazAqparat.
«Elimizdiń meditsinalyq uiymdaryn dári-dármekpen úzdiksiz qamtamasyz etý máselesi Úkimettiń erekshe baqylaýynda. Ózderińiz biletindei, koronavirýs infektsiiasyn juqtyrǵandar sanynyń ósýine bailanysty maýsym aiynyń sońy men shilde aiynyń basynda elimizdiń aýrýhanalary men provizorlyq ortalyqtarynda dári-dármek tapshylyǵy boldy. Bul tapshylyq bólshek saýda jelisinde kórinis tapty. Osy maqsatta naryqty dárilik zattarmen tolyqtyrý úshin QR Úkimeti basqa elderden 10 mln-nan astam qaptama kóleminde ushaq borttarymen dárilik zattardyń 50-den astam ataýyn jetkizýdi uiymdastyrdy. Bul dári-dármekter aimaqtar arasynda birkelki bólindi», - dedi N. Asylbekov Ortalyq kommýnikatsiialar qyzmetinde.
Osy oraida ol naryqqa ákelýdi ári qoljetimdikti ońailatý úshin ministrlik ruqsat berý qujattaryn 1 táýlikke deiin berý rásimderin jeńildetkenin eske saldy.
«Sonymen qatar, koronavirýstyń yqtimal ekinshi tolqyny jaǵdaiynda óńirlerde suranysqa ie dárilik preparattardy satyp alý úshin kóterme distribiýtorlarǵa qaitarymdy negizde qarajat bólý turǵysynda turaqtandyrý qorlary uiymdastyryldy. Budan basqa, Farmatsevtikalyq baqylaý komiteti óńirlerdegi kóterme distribiýtorlarda, bólshek saýdada neǵurlym suranysqa ie dárilik zattardyń, meditsinalyq zattardyń bolýyna monitoringti turaqty negizde júrgizip otyr», - dedi komitet ókili.
Osy oraida monitoring nátijelerin taldaý barysy biylǵy 15 shildeden 9 qarashaǵa deiin kóterme saýda qoimalary men dárihanalarda antibiotikter 3,9 ese, virýsqa qarsy preparattar 3,2 ese, antikoagýlianttar 32 eseden astam, maskalar 2,3 ese jáne basqa da dárilik zattar qorynyń ósýin kórsetti.
«Qazirgi kezde dárihanalarda halyqtyń dárilik zattarǵa qajettiligin qamtamasyz etý úshin preparattar jetkilikti», - dedi Asylbekov Nurlybek.
