Qazaqstanda zańsyz iemdengen qarý-jaraqty tárkileý sharasy júrip jatyr, dep habarlaidy QazAqparat.
«Biyl aqpan aiynan beri el aýmaǵynda «Qarý» jedel aldyn alý is-sharasy ótip jatyr. Shara qarýdy qoldaný arqyly jasalatyn qylmystardyń aldyn alýǵa baǵyttalǵan. Búginde politsiia organdarynda 235 myńǵa jýyq azamattyq qarý iesi jáne 2 myńnan astam qyzmettik qarý sýbektisi esepte tur. Qabyldanǵan sharalardyń nátijesinde 2 aida zańsyz ainalymnan 1 000 birlikten astam atys qarýy alyndy. Sondai-aq, 7 myńnan astam qarý oǵy tárkilendi», - dedi QR IIM ókili Shuǵyla Turlybek brifing barysynda.
Onyń aitýynsha, jedel aldyn alý sharasy aiasynda elimizde 1900-ge jýyq zańdy tulǵa jáne 92 qarý-jaraq dúkeni tekserildi.
«Odan bólek, shara barysynda 73 myńnan astam fermerlik, sharýa qojalyqtary tekserilip, 205 myńnan astam azamattyq qarý ieleri turǵylyqty jeri boiynsha qaraldy. Tekserý nátijesinde 4,8 myń zańbuzýshylyq anyqtaldy. Onyń ishinde qarýdy saqtaý jáne alyp júrý 3200, al ony tirkeý jáne qaita tirkeý tártibi boiynsha 1,5 myń ereje saqtalmaǵan», - deidi ol.
Sondai-aq, IIM ókili qarý men oq-dárilerdi zańsyz saqtaǵany úshin qylmystyq jáne ákimshilik jaýapkershiliktiń baryn eske saldy.
«Qarý-jaraqty zańsyz saqtaǵany jáne alyp júrgeni úshin qylmystyq jaýapkershilikti kózdeitin 325 material tirkeldi. Sol siiaqty 519 azamat ákimshilik jaýapkershilikke tartyldy. Esterińizge sala keteiin, zańsyz saqtalǵan qarýdy, oq-dárilerdi jáne jarylǵysh zattardy óz erkimen tapsyrǵan adamnyń ózge qylmysy bolmasa, jaýapkershilikten bosatylady», - deidi ókil.
Osy oraida IIM qazaqstandyqtardan zańsyz saqtalǵan qarý-jaraq, oq-dári, jarylǵysh zattar jáne arnaiy quraldardy óz erkimen tapsyrýǵa shaqyrady.
