Osy jyldyń tamyzynda áskerge shaqyrylatyn jastar COVID-2019 boiynsha PTR-testten ótedi. Olardyń bul testten ótýin jergilikti atqarýshy organdar qadaǵalaýy tiis, dep habarlaidy QazAqparat.
«Elimizde tótenshe jaǵdai engizilgennen bastap Qarýly kúshter ártúrli mindetterdi belsene atqarýda. Búgingi tańda 9500 áskeri qyzmetshi patrýldeýdi, dezinfektsiia jumystaryn jáne basqa da mindetterdi iske asyryp jatyr. Áskeri qyzmettiń belgilengen merzimin ótkergen merzimdi áskeri qyzmetshilerdiń zapasqa shyǵarýdy toqtata turý jáne azamattardy áskerge shaqyrý merzimin aýystyrý týraly sheshim – bizdiń memleketimizdiń tarihynda alǵash ret qabyldanyp otyr. Bul is azamattardyń qaýipsizdigin qamtamasyz etýge baǵyttalǵan. Jaǵdaidy túsinip qaraýdy suraimyz», - dedi QR Qarýly kúshteri Bas shtabynyń uiymdastyrý, jumyldyrý jumystary departamentiniń bastysy Sáken Júsipov OKQ-da onlain rejimde ótken baspasóz máslihatynda.
Sáken Júsipovtyń aitýynsha Qarýly kúshterde merzimdi áskeri qyzmetten bosaǵan sarbazdardyń qaýipsizdigin saqtaý boiynsha da birqatar shara qabyldanyp jatyr.
«Sondai-aq jergilikti atqarýshy organdar áskeri qyzmetke shaqyrylǵan azamattardy PTR-testterden ótkizip, shaqyrylýshylardy habarlandyrý men jinaý, meditsinalyq kýálandyrý kezinde, jinaý men attandyrý beketterinde barlyq sanitarlyq-epidemiologiialyq talaptyń saqtalýyn qadaǵalaýy kerek», - dedi ol.
Aita ketsek buǵan deiin Sáken Júsipov Tótenshe jaǵdai kezinde 2019 jyldyń kókteminde áskerge shaqyrylǵan merzimdi áskeri qyzmetshilerdi zapasqa shyǵarý ýaqytsha toqtatylǵanyn málim etken edi. Sonymen qatar Memleket basshysynyń Jarlyǵymen azamattardy merzimdi áskeri qyzmetke shaqyrý merzimi 2020 jyldyń maýsymynan tamyzyna aýystyrylyp otyr.
Eske sala ketsek QR Prezidenti Qasym-Jomart Toqaev áskeri qyzmetshilerdi zapasqa shyǵarý týraly Jarlyqqa qol qoiǵan bolatyn.
