Qazaqstanda apatty jaǵdaidaǵy 40-tan astam sý qoimasy qaita jóndelip jatyr. Bul týraly QR «kologiia, geologiia jáne tabiǵi resýrstar ministri Maǵzum Myrzaǵaliev málim etti, dep habarlaidy QazAqparat.
«Búginde respýblikalyq menshikte uzyndyǵy jiyrma 21,5 myń shaqyrymdy quraityn 3 298 sýarý jelisi bar. Onyń ishinde 11,9 myń shaqyrym jeliniń jaǵdaiy qanaǵattandyrmaidy. Osynyń saldarynan fermerlerge sý jetkizýde shyǵyn kóp. Aita ketý kerek, aýyl sharýashylyǵynda negizgi sý tutynýshy sýarmaly eginshilik salasy bolyp otyr. Osy oraida Memleket basshysynyń tapsyrmasyna sáikes biz sýarmaly jer kólemin 2030 jylǵa deiin 1,6 mln gektardan 3,0 mln gektarǵa deiin jetkizýimiz kerek. Bul maqsatta 2019-2020 jyldary 1734 shaqyrymdy quraityn kanal jóndelip, 111,5 myń gektar sýarmaly jer ainalymǵa engizildi. Bul óz kezeginde qosymsha 22,3 myń jumys ornyn qurýǵa jáne aýyl sharýashylyǵy óniminiń kólemin jyl saiyn 94,8 mlrd teńgege ulǵaitýǵa múmkindik berip otyr», - dedi Myrzaǵaliev.
Ministrliktiń málimetinshe, biyl 1050 shaqyrym sýarý jelisin qaita qurý josparlanǵan.
«Biyl 15 maýsymdaǵy jaǵdai boiynsha onyń 540 shaqyrymdy oryndaldy. Bul kólemi 78,0 myń gektar sýarmaly jerlerdi ainalymǵa engizýge múmkindik beredi. Bul jyl saiyn 66 mlrd teńgege aýyl sharýashylyǵy ónimderin óndirýge jáne 16 myń turaqty jumys ornyn qurýǵa múmkindik beredi. Sondai-aq sý shyǵyny 40-tan 17 paiyzǵa deiin tómendeidi. 2025 jylǵa qarai sýarmaly jerlerdiń aýdany 2,2 mln gektarǵa deiin jetedi. Sonymen qatar 5 jyl ishinde shamamen 2,5 myń km kanal qaita jańartylyp, 600 myń gektar jer ainalymǵa engiziledi. Bul aýylda 120 myń jumys ornyn qurýǵa jáne jyl saiyn 510 mlrd teńge somasyna ónim ósirýge yqpal etetin bolady», - deidi ol.
Odan bólek, ministr 41 apatty sý qoimasynyń qaita qalpyna keltirilip jatqanyn aitty. Atap aitqanda, 2017-2019 jyldary 10 nysan paidalanýǵa berilse, ótken jyly 2 nysan daiyn bolǵan. Al biyl 8 sý qoimasyn qaita qalpyna keltirý jumysyn aiaqtaý josparlanýda.
Qalǵan 21 nysan boiynsha vedomstvo basshysy jóndeý jumystarynyń 2025 jylǵa deiin júzege asyrylatynyn jetkizdi.
