© Fotolia / Sunny studio
Qazaqstandaǵy merekelik kúnderdiń tizbesi jańa merekelermen tolyqty. Úkimet basshysy tiisti qaýlyǵa qol qoidy.
Halyqaralyq bekitilgen kúnderge sáikes «Analar kúni» merekesi mamyr aiynyń ekinshi jeksenbisinde, «Ákeler kúni» merekesi maýsymnyń úshinshi jeksenbisinde aýqymdy túrde atap ótiledi. Bul týraly Aqparat jáne qoǵamdyq damý ministri Darhan Qydyráli áleýmettik jelidegi paraqshasynda habarlady.
«Halqymyzdyń «Otan otbasynan bastalady» degen naqyl sóziniń máni tereńde jatsa kerek. Memleket basshysy Qasym-Jomart Toqaev: «Berekeli ári baqytty otbasy qýatty eldiń tiregi», – degeni belgili.
Otbasyn nyǵaitatyn faktorlardyń biri – áýlet músheleriniń birge ýaqyt ótkizýi, ortaq qýanyshty birge atap ótýi ekeni anyq. Ministrlikke qarasty Qazaqstandyq qoǵamdyq damý institýtynyń «Qazaqstandyq otbasylar» ulttyq baiandamasynda kórsetilgendei, elimizdegi otbasylyq dástúrlerdiń dińgegi – áýlet músheleriniń týǵan kúnin atap ótý eken. Bul saýalnamaǵa qatysqan 86%-dan astam respondenttiń oi-pikiri. Sondai-aq otbasylardyń jartysynan kóbi jańa jyl, 8 naýryz, 22 naýryz jáne taǵy basqa memlekettik merekelerdi ataǵan.
Sol sebepti bekitilgen áziz ákeler men ardaqty analarǵa arnalǵan bul ataýly merekeler ulttyq bolmysymyzǵa sai jańa mazmunda toilanyp, jalpyhalyqtyq sipat alady degen oidamyz» - dep jazdy ministr.
Onyń aitýynsha, atalǵan merekeler otbasy institýtyn nyǵaitýǵa, analarymyz ben ákelerimizdiń mártebesin kóterýge, otbasylyq qundylyqtardy damytýǵa, áýlettegi jaqyndyqtyń, qurmet-yqylastyń berik ornaýyna jáne otbasyndaǵy bereke-birliktiń artýyna yqpal etedi.
«Ákeler kúni demekshi, osydan 40 jyl buryn ardaqty ákemiz máńgilik saparǵa attanǵan edi. Ómirden erte ozǵan ákemizdiń jarqyn beinesi, ol týraly jyly estelikter áli kún jadymyzda. Sondyqtan ákege, anaǵa qurmet, kóz tirisinde qadirine jetý árdaiym kóńil tórinde turýǵa tiis dep bilemiz.
Búgingi Balalar quqyǵyn qorǵaý kúninde paida bolǵan máni zor merekeler qutty bolsyn! Ákelerimiz ben analarymyz aman bolsyn!» - dedi Darhan Qydyráli.
