Qazaqstanda aǵashtardy zańsyz kesýge qatysty zańnama talaptary aitarlyqtai kúsheitiledi, dep habarlaidy "Ult aqparat".
Senattyń jalpy otyrysynda depýtat Sergei Ershov Almatydaǵy Sulpak dúkeni mańyndaǵy aǵashtardy kesý jaǵdaiy turǵyndardyń zańdy narazylyǵyna alyp kelgenin atap ótti. Osy oraida bul baǵytta jaýapkershilikti kúsheitý qadamdary týraly suraq qoiyldy.
«Tiisti normalar ýaqytyly egizilip otyr jáne olarǵa qoldaý jasaldy. Aǵashty zańsyz kesýge qatysty normalar úsh baǵytta qarastyrylyp otyr. Birinshiden, qaladaǵy aǵashtarǵa toqtalsaq, bul turǵyda aǵashtardy ótemaqylyq tártipte otyrǵyzýǵa bailanysty Indýstriia jáne infraqurylymdyq damý ministriniń buiryǵyna ózgeris engiziledi», - dedi Ekologiia, geologiia jáne tabiǵi resýrstar ministri Maǵzum Myrzaǵaliev.
«Ekinshiden, aǵashty zańsyz kesýge qatysty shyǵyndy óteýdi retteitin Úkimet qaýlysy eskerilgen. Eki apta buryn Úkimet otyrysynda qaýlyǵa tiisti ózgerister engizildi. Shyǵynǵa bailanysty zańnama talaptary aitarlyqtai kúsheitildi», - dedi vedomstvo basshysy.
Eske sala ketsek, 23 qarashada túnde Almatyda saýda úiiniń janyndaǵy jaiqalǵan emen men qaraǵash otaldy. Bul týraly turǵyndar áleýmettik jelide narazylyq bildirdi.
«Qazir aýdan ákimdigi men politsiia departamenti kesilgen aǵashtardyń tuqymy men sapasyn anyqtaý úshin oqiǵa ornynda jumys istep jatyr. Aiypty tulǵalar anyqtalǵan soń Politsiia Departamenti olardy jaýapkershilikke tartady. Tolyǵyraq aqparatty anyqtaý jumystary aiaqtalǵan soń jariialaimyz», - dep málim etti qala ákimdigi.
Keiin Almaty qalalyq jasyl ekonomika basqarmasy saýda úiiniń aldyndaǵy aǵashtardyń jappai kesilýiniń mán-jaiyn anyqtady.
Prezident Qasym-Jomart Toqaev Almaty qalasy Tóle bi kóshesindegi aǵashtardyń otalǵanyna qatysty jaǵdaiǵa nazar aýdardy.
Memleket basshysy Almaty ákimi Baqytjan Saǵyntaevqa atalǵan jaǵdaiǵa bailanysty qyzmettik tekserý júrgizip, kinálilerdi jaýapkershilikke tartýdy tapsyrdy.
24 qarasha kúni qala ákimi Baqytjan Saǵyntaev máseleni óz baqylaýyna alǵanyn málim etti.
