Elimizde 670-ten astam temirjol jáne 482 avtomobil joly ýchaskesin sý basý qaýpi bar. Bul jaiynda Májilis depýtattarynyń saýalyna QR Premer-Ministri Asqar Maminniń jaýabynda aitylǵan, dep habarlaidy "Ult aqparat".
«Memlekettik organdar sý tasqyny jaǵdaiyn boljaý úshin Qazaqstan aýmaǵyna tóngen tabiǵi qaýipter men apatty qubylystar týraly daýyldy eskertýlerdi uiymdastyrýda resmi aqparattyq qyzmet kórsetý quqyǵy bar, jalǵyz jaýapty organ sanalatyn «Qazgidromet» RMK málimetterin paidalanady. Buǵan qosa, memlekettik organdar Jaiyq, Syrdariia, Talas, Shý transshekaralyq ózenderiniń sý tasqyny jaǵdaiyna boljam jasaý úshin Resei, Ózbekstan jáne Qyrǵyzstannyń gidrometeorologiialyq qyzmetteriniń boljamdy málimetterin paidalanady», - dedi Úkimet basshysy.
Onyń atap ótýinshe, «Qazgidromet» málimetterine sáikes, osy jyldyń 11 naýryzynda Soltústik Qazaqstan, Aqmola, Aqtóbe, Qostanai, Batys Qazaqstan, Qaraǵandy oblystaryndaǵy ózen basseinderindegi ylǵaldylyq kólemi ortasha kópjyldyq mánnen joǵary bolyp otyr. Sonymen qatar Aqmola, Batys Qazaqstan, Qaraǵandy, Qostanai jáne Soltústik Qazaqstan oblystarynda jer tońynyń qalyńdyǵy da ótken jylǵy kórsetkishten joǵary.
«Buǵan qosa, atalǵan óńirlerde qar jinalý protsesi jalǵasyp jatyr. Osylaisha, aýa temperatýrasy kúrt jylynyp, qar eritin bolsa, onda 276 eldi mekendi (270 myńnan astam adam turady), avtomobil joldarynyń 482 ýchaskesin, temirjoldyń 673 ýchaskesin, 59 avtomobil kópirin sý basý qateri bar», - dedi Asqar Mamin.
