Elimizde 18,5 myń nashaqor esepte tur. Bul týraly QR IIM Esirtki qylmysyna qarsy is-qimyl departamenti basqarmasynyń bastyǵy Baqytjan Ámirhanov málim etti, dep habarlaidy QazAqparat.
«Birikken ulttar uiymynyń málimeti boiynsha sońǵy 10 jylda esirtkige táýeldi adamdardyń sany 22 paiyzǵa ósken. Álemde shamamen 275 mln nashaqor adam bar. Esirtki jyl saiyn 500 myńnan astam adamnyń ólimine sebepshi bolyp otyr. 19 mln halqy bar Qazaqstan úshin esirtkige elitýdiń tipti, eleýsiz kórsetkishi ulttyq qaýipsizdikke aitarlyqtai qater tóndiredi. Densaýlyq saqtaý ministrliginiń málimetterine súiensek elimizde 18,5 myńnan astam nashaqor tirkeýde tur. Onyń ishinde 1,5 myńy - áiel, al 94-i - jasóspirim», - dedi ol ministrliktiń baspasóz alańynda ótken brifing barysynda.
Biraq, Ishki ister miinstrliginiń ókili bul naqty tirkeýde turǵandardyń sany ekendigin aitady.
«Al shyn ahýalǵa keletin bolsaq, naýqastar sany birneshe ese artyp jyǵylady. Qazaqta «Jalǵyzdyń úni shyqpas, jaiaýdyń shańy shyqpas» degen maqal bar. Sol siiaqty tek quqyq qorǵaý organdarynyń ǵana kúshimen álemdi jaýlaǵan bul indetti jeńe almaimyz. «Jumyla kótergen júk jeńil» demekshi, barlyq múddeli quzyrly memlekettik organdardyń, jergilikti atqarýshy organdardyń, qoǵam ókilderiniń, memlekettik emes uiymdardyń, jalpy jurtshylyqtyń birlesken kúsh-jigeri jumyldyrylýy abzal. Osy oraida Úkimet basshylyǵymen arnaiy profilaktikalyq is-sharalar jospary bekitilip, joǵaryda atalǵan barlyq organdar men uiymdardyń qatysýymen el boiynsha árbir jasóspirimge jáne olardyń ata-analaryna esirtkiniń ziiany týraly túsindirý maqsatynda keń aýqymdy is-sharalar ótkizilip jatyr», - dedi Baqytjan Ámirhanov.
