Qazaqstandyq kásipqoi boksshy Daniiar Eleýsinov (7-0, 3 KO) 34 jastaǵy amerikalyq Reshard Hikske (12-0-1, 6 KO) qarsy jekpe-jekke daiyndyǵyn aiaqtady, dep habarlaidy Sports.kz portaly.
Boksshynyń menedjeri Ziia Álievtiń aitýynsha, ol sońǵy sparringti senbi kúni ótkizgen.
«Daniiar ózin jaqsy sezinip júr. Sońǵy sparring senbi kúni boldy. Biz daiyndyqty aiaqtadyq. Daniiardy jekpe-jekke Derik Santos, Garri Klark jáne Daniiardyń ákesi Marat aǵa daiyndap jatyr», - dedi Z.Áliev.
Eske sala keteiik, jekpe-jek 13 qyrkúiek kúni Niý-Iorktiń «Madison Square Garden» arenasynda ótedi. Aiqas on raýndqa eseptelgen. Boks keshiniń basty jekpe-jegi amerikalyq Devin Heini (22-0, 14 KO) men reseilik Zaýr Abdýllaevtyń (11-0, 7 KO) arasynda ótedi.
Eleýsinov sońǵy kezdesýin biylǵy 25 mamyrda AQSh-tyń Merilend shtatynda ótkizgen bolatyn. Ol tóreshilerdiń sheshimimen chililik Lýs Norambýenany (3-4-1, 0 KO) jeńdi.
