Qazaqstanda avtomobil jolymen elektrosamokattardyń júrýine tyiym salynady. Bul týraly QR Ishki ister ministri Erlan Turǵymbaev málim etti, dep habarlaidy QazAqparat.
«Qazirgi ýaqytta jyldamdyǵy saǵatyna 80 shaqyrymǵa jetetin samokattar bar. Biraq qoldanystaǵy zańnamaǵa sáikes, olar jol qozǵalysyna qatysýshy bolyp sanalmaidy. Iaǵni, jol qozǵalysy týraly zańda mundai kólik quraly joq», - dedi E. Turǵymbaev Ortalyq kommýnikatsiialar qyzmetinde.
Ministr elektrosamokattardyń avtojolmen nege júre almaitynyn túsindirdi.
«Birinshiden, bul tehnikalyq qural sertifikattaýdan ótpegen. Ekinshiden, olar kólik quraly talaptaryna sai kelmeidi. Iaǵni bul – dońǵalaqtardyń diametri, tejegish júiesi, gabaritti shamdardyń, artqy kórinis ainalarynyń jáne qaýipsizdik júiesiniń bolmaýy. Qazirgi ýaqytta elektrosamokattarǵa joldar men trassalar boiynsha júrýge qatań tyiym salynǵan jáne olar jol qozǵalysy qatysýshylary bolmaǵandyqtan, dereý toqtatylady», - dep atap ótti Erlan Turǵymbaev.
Onyń aitýynsha, samokattardyń velosiped joldary men trotýarlarda júrýi máselesi qaralyp jatyr.
«Birqatar samokattyń jyldamdyǵy saǵatyna 20 shaqyrymnan asady. Keibir elderde shekteýler engizilgen. Mysaly, Ulybritaniiada jeke aýmaqtan basqa jerde samokat qoldanýǵa tyiym salynady. Basqa da Eýropa elderinde samokattardyń jyldamdyǵyna bailanysty shekteýler bar. Iaǵni, saǵatyna 20 shaqyrymǵa deiingileri velosiped joldarynda júre alady, al eger jyldamdyq rejimi saǵatyna 12 shaqyrymnan az bolsa, jaiaý júrginshiler jolynda júrýge ruqsat. Bizdiń elimizde bul másele áli rettelmegen», - dep túsindirdi Erlan Turǵymbaev.
