«Eńbek resýrstaryn damytý ortalyǵy» AQ-nyń (ERDO) derekteri boiynsha 2020 jyldyń VI toqsanynda Elektrondyq eńbek birjasynda (EEB) biliktilikti talap etetin 165,6 myń bos jumys orny jáne 74,5 myń reziýme ornalastyrylǵan, dep habarlaidy QR Eńbek jáne halyqty áleýmettik qorǵaý ministrliginiń baspasóz qyzmeti.
Sonymen qatar, 4-toqsan boiynsha eń kóp bos jumys oryndary qazan aiynda – 68,2 myń bos jumys orny (41%) jáne 33 myń reziýme (44%) ornalastyryldy. Jalpy, jyl sońyna qarai jaldaý jáne jumys izdeý boiynsha habarlandyrýlardy ornalastyrý úrdisi tómendegeni baiqalady. Osylaisha,
4-toqsanda bos jumys oryndarynyń jalpy sany 3-toqsanmen salystyrǵanda 6,3%-ǵa, al reziýmeler sany 37%-ǵa azaidy.
«2020 jylǵy 4-toqsanda bilikti qyzmetkerler úshin bos jumys oryndarynyń sany boiynsha Nur-Sultan jáne Almaty qalalarynda jumys berýshilerdiń eń kóp usynysy kelip tústi: tiisinshe 18,3 myń jáne 18 myń. Qaraǵandy oblysynda – 17,4 myń», – dedi ERDO Boljamdaý departamentiniń direktory Dmitrii Shýmekov.
VI toqsanda ornalastyrylǵan reziýmeniń eń kóp sany batys óńirlerine: Atyraý (6,2 myń) jáne Mańǵystaý oblystaryna (6 myń) tiesili boldy.
Kásiptik toptar bólinisinde jumys berýshilerde ónerkásip, qurylys, kólik jáne basqa da uqsas kásipter jumysshylarynyń toptary suranysqa ie boldy; mamandar-kásipqoilar; sondai-aq óndiristik jabdyq operatorlary, qurastyrýshylar men júrgizýshiler – árbir sanat úshin EEB-da 34 myńnan astam bos jumys orny.
ERDO-nyń derekterine sáikes VI toqsanda reziýme men bos jumys oryndarynyń araqatynasy boiynsha tapshy mamandyqtar qataryna qazandyq operatorlary (3,4 myń bos jumys orny), kúzetshiler (3,1 myń), tiginshiler (2,3 myń), qazandyq mashinisteri (ot jaǵýshylar) (2,2 myń), satýshylar-kassirler (2,2 myń) kirdi. Reziýme men bos jumys oryndarynyń araqatynasy boiynsha artyq kásipterdiń tizimin zańgerler bastap tur.
«Aqtóbe, Almaty, Jambyl, Qaraǵandy, Qyzylorda, Pavlodar, Shyǵys Qazaqstan oblystarynda, sondai-aq Nur-Sultan, Almaty jáne Shymkent qalalarynda zańgerler artyq. Bul rette Atyraý jáne Mańǵystaý oblystarynda avtokólik júrgizýshileriniń, Al Qostanai oblysynda mal ósirýshileriniń kóp ekeni baiqalady», – dep qorytyndylady sarapshy.
Óz kezeginde Aqtóbe, Atyraý, Batys Qazaqstan, Jambyl, Soltústik Qazaqstan, Túrkistan oblystarynda qazandyq operatorlary men qazandyq mashinisteri (ot jaǵýshylar) jetispeidi, bul jumys maýsymdylyǵymen bailanysty bolýy múmkin. Aqmola oblysynda aýyl sharýashylyǵynyń injener-mehanizatorlary, Almaty oblysynda – áleýmettik qyzmetkerler men feldsherler, Qaraǵandy oblysynda – shoshqa ósirý keshenderi men mehanikalandyrylǵan fermalardyń kúzetshileri men operatorlary, Qostanai oblysynda – avtomobil júrgizýshileri, Qyzylorda oblysynda – satýshylar-kassirler, Mańǵystaý oblysynda – dispetcherler-operatorlar, Pavlodar oblysynda – esepke alý tehnikteri, al Shyǵys Qazaqstan oblysynda – elektrgazben dánekerleýshiler tapshy. Elordada júrgizýshiler, betonshylar men kúzetshiler, Almatyda – ofis-menedjerler men kassirler, al Shymkentte-tiginshiler tapshylyǵy baiqalady.
