Árbir talapker jeke kompiýterde otyryp, UBT tapsyrmalaryn oryndaidy. Bul týraly QR BǴM joǵary jáne joǵary oqý ornynan keiingi bilim departamentiniń direktory Ádilet Toibaev aitty, dep habarlaidy QazAqparat.
«Ulttyq biryńǵai testileý elektrondy formatta «bir testilenýshi – bir kompiýter – bir kamera» qaǵidaty boiynsha uiymdastyrylady. Demek, árbir qatysýshy jeke kompiýterde otyryp, UBT tapsyrmalaryn oryndaidy. Aqparattyq qaýipsizdikti qamtamasyz etýge erekshe nazar aýdardyq. Testileý protsesi shifrlaý elementteri bar arnaiy jabyq VPN jelisi arqyly júzege asyrylady», - dedi Á. Toibaev Ortalyq kommýnikatsiialar qyzmetinde.
Bilim ministrliginiń málimetinshe, aýditoriiada ne bolyp jatqanyn kórsetetin kameralardan basqa, testilenýshi otyratyn ár ústeldiń ústinde taǵy bir kamera ornatylady. Proktoring pen beinebaqylaýdyń zamanaýi júiesi jáne UBT-da bógde adamdardy boldyrmaý úshin Face ID tsifrlyq sáikestendirý qurylǵysy paidalanylady.
Erejelerdiń saqtalýyn arnaiy kompiýterlik baǵdarlama baqylaidy, Ol tyiym salynǵan zattardy qoldaný faktilerin avtomatty túrde anyqtaidy. Eger UBT tapsyrý kezinde talapkerdiń smartfon, shpargalka jáne t.b. tyiym salynǵan zattardy paidalanǵany anyqtalsa, testileý avtomatty túrde toqtatylady, testilenýshiniń nátijeleri joiylady.
Testileý protsesin qosymsha ahýaldyq ortalyq baqylaidy. Sondai-aq ashyqtyq pen obektivtilikti qamtamasyz etý úshin UBT-ny ótkizý rásimine Qazaqstan Respýblikasy Sybailas jemqorlyqqa qarsy is-qimyl agenttiginiń Arnaiy monitoringtik toby men «Adaldyq alańy» jobalyq keńsesiniń ókilderi shaqyrylatyn bolady.
