Qazaqstanda 1 sáýirden bastap elektr energiiasynyń tarifteri ósedi. Tariftiń kóterilýiniń sebebin týraly «Jambyl GRES» AQ Direktorlar keńesiniń múshesi, Bas direktorynyń keńesshisi Vladimir Melejik túsindirdi, dep habarlaidy QazAqparat.
Onyń aitýynsha, búgingi tańdaǵy tarif elimizdegi barlyq elektr stansalary úshin tiimsiz. Óitkeni árbir elektr stansasynyń ózindik quny shekti tariften áldeqaida joǵary.
«Shyǵystardyń barlyq baby eskerilmegen, sondyqtan salanyń turaqty damýy úshin elektr energiiasyna shekti tarifterdi jyl saiyn infliatsiia deńgeiin eskere otyryp túzetý qajet, bul kóptegen jyldar boiy bolǵan joq. 2009-2015 jyldar aralyǵynda tarif jyl saiyn ereje boiynsha 1 qańtardan bastap kóterilip, barlyǵy bul týraly bildi, josparlaryn jasap quryp, jańǵyrtý jumystaryn júrgizdi», - dep atap ótti V.Melejik.
Ol atap ótkendei, 2019 jyly elektr qýaty naryǵy engizildi. Sol kezde, qýat aqysy stansanyń qýatyn arttyrý úshin jańǵyrtý jumystaryn júrgizýge jetkilikti deńgeide bolady dep boljandy.
«Alaida, qýat naryǵynyń engizilýimen energiia óndirýshi stansalarǵa elektr energiiasyn óndirýge arnalǵan bosatý tarifi tómendetildi, bul qarjylyq turaqtylyq pen tehnikalyq tiimdiliktiń nasharlaýyna aitarlyqtai áser etti», - dep qosty ol.
V.Melejiktiń aitýynsha, árbir energiia óndirýshi uiym óziniń barlyq esepteýi men negizdemesi bar qujattar paketin 2020 jyly qaraýǵa jibergen. Osy rette, ol búgingi kúngi túiitkildi máselelerge toqtaldy.
«Biz - energiia óndirýshi uiymbyz. Taratýshy uiym bar, jetkizýshi bar jáne paradoks bar, biz bir tizbekpen bailanysyp, sol ónimdi satamyz, biraq tarifter bizge ártúrli organdardy bekitedi: Bizge - Energetika ministrligi, al jetkizýshi uiymdar men taratýshylarǵa – Tabiǵi monopoliialardy retteýdi baqylaý departamenti jáne monopoliiaǵa qarsy komitet. Mine, 1 sáýirden bastap energiia óndirýshi tarif joǵarylaidy, sońǵylary ótinim beredi jáne olarǵa tarifti bekitýge shamamen 5-6 ai ketedi. Tiisinshe alymdar joq, olar bizge satyp alynǵan elektr energiiasy úshin tólemeidi. Mundai kollaps oryn alýda», - dep túiindedi V.Melejik.
Eske sala keteiik, tarifterdi túzetý 30 naýryzda Qazaqstan Respýblikasy Energetika ministriniń tiisti buiryǵymen júrgizilgen bolatyn. Osy buiryq 2021 jylǵy 1 sáýirden bastap engizilýi tiis.
