Foto: instagram.com/yeldos60kg
Kelesi aidan bastap Álem chempionatynyń jeńimpazy Jarqynai Rahymbaeva jáne qola júldeger Serǵali Ábilda, biylǵy Paralimpiadanyń parajúzýden kúmis júldegeri Nurdáýlet Jumaǵali men bapkeri Sattar Beisembaevtyń jalaqysy ósedi. Al Eldos Smetovtyń bapkeri kelesi olimpiadaǵa deiin ai saiyn 4 mln teńge qosymsha jalaqy alady. Osy aptada ótken Jambyl oblystyq máslihatynyń sessiiasynda osyndai sheshim qabyldandy, dep habarlaidy «Ult aqparat» Kazinform-ǵa silteme jasap.
Jarqynai Rahymbaeva jáne Serǵali Ábilda 16-26 tamyz aralyǵynda Kishinev qalasynda ótken jarysta armrestlingten júldeger atanǵan bolatyn.
Júldegerler jalaqysynyń kóterilýi Jambyl oblysy ákimdiginiń 2017 jylǵy 27 qarashadaǵy N262 qaýlysyna sáikes júzege asty. Endi Jarqynai Rahymbaevanyń buǵan deiin alyp kelgen jalaqysyna - 162 448 teńge, Serǵali Ábildanyń jalaqysyna - 81 244 teńge, Nurdáýlet Jumaǵalidyń jalaqysyna - 2 148 744 teńge, Sattar Beisembaevtyń jalaqysyna - 974 668 teńge qosylady.
Bapker Sattar Beisembaev osyǵan deiin 385 044 teńge jalaqy alyp kelse, Nurdáýlet Jumaǵalidyń jalaqysy 1 271 812 teńge kóleminde bolǵan.
Taǵy bir aitary, Olimpiada oiyndarynyń altyn júldegeri Eldos Smetovtyń jattyqtyrýshysy Ǵalymjan Jylgeldievtiń de jalaqysyna qyrkúiek aiynan bastap 4 mln teńge qosyldy. Bul Sport jáne dene shynyqtyrý agenttigi tóraǵasynyń 2014 jylǵy 28 shildedegi buiryǵyna sáikes júzege asty.
Jambyl oblystyq ekonomika jáne biýdjettik josparlaý basqarmasynyń mamandary bul - sportshylardyń álemdik dodalarda júlde alýyna bailanysty jalaqysyna avtomatty túrde qosylatyn tólem ekenin aitady.
Al, Eldos Smetovtyń jalaqysyna ál-ázirge eshqandai aqsha qosylǵan joq. Smetov oblys ákiminiń qaýlysyna sáikes eń joǵary jalaqy - 2 684 000 teńge alady.
Endi Jambyl oblystyq sport basqarmasy qaýlyǵa ózgerister engizip, chempionnyń da jalaqysyn kóterýge qadamdar jasap jatyr. Bul kelesi jyldan bastap iske asýy múmkin.
