Dziýdodan Qazaqstan komandasynyń úzdigi Eldos Smetov Tokio Olimpiadasynyń qola júldegeri atandy, dep habarlaidy "Ult aqparat".
60 keli salmaqta synǵa túsken Eldos qola úshin jekpe-jekte Niderland ókili Tornie Tsakadjoeni jeńdi. Jeńimpaz qosymsha ýaqytta anyqtalyp, Eldos «vazzari» upaiyn ielendi.
Rio Olimpiadasy-2016 kúmis júldegeri alǵashqy jekpe-jekte túrik palýany Mirhadj Akkýshtan basym tústi. Qazaqstandyq dziýdoshy óz qarsylasyn ipponmen jeńdi.
Osydan keiin Smetov Ońtústik Koreianyń sportshysy Kim Von Djindi utty. Alaida jartylai finalda japondyq Naohisa Takatodan jeńilip qaldy.
Osylaisha otandasymyz qola júldeger atanyp, Tokio Olimpiadasynda Qazaqstan qorjynyna alǵashqy medaldy saldy.
Aita ketken jón, Eldos 2016 jylǵy Olimpiadada dál osy salmaqta kúmis júldege ie bolǵan edi. Sonymen qatar ol - Álem chempiony (2015), Aziia oiyndary men chempionatynyń jeńimpazy. Al Naohisa Takato Braziliiada ótken tórt jyldyqtyń basty básekesinde qolany qanaǵat tutqan bolatyn.
Buǵan deiin áielder arasynda qazaqstandyq Galbadrah Otgontsetseg qytailyq Ianan Liden utylǵan edi.
Aita keteiik, Tokio Olimpiadasyna alty qazaqstandyq dziýdoshy attandy. Olar: Eldos Smetov, Erlan Serikjanov, Jansai Smaǵulov, Didar Hamza, Islam Bozbaev jáne Otgontsetseg Galbadrah.
Tokioda Olimpiada oiyndary 23 shilde men 8 tamyz aralyǵynda ótedi. Qazaqstandyq quramada sporttyń 27 túrinen 97 litsenziia bar.
