11 tamyz kúni Olimpiadanyń kúmis júldegeri, dziýdodan Qazaqstan ulttyq quramasynyń kóshbasshysy Eldos Smetov elordanyń jas dziýdoshylarymen kezdesip, tájiribesimen bólisti.
Elordada «B-Platinum» sport kesheninde uiymdastyrylǵan dańqty balýanmen kezdesýge 50-ge jýyq jasóspirim dziýdoshy qatysty.
Smetov osyndai ashyq kezdesýdiń kóptep uiymdastyrylyp jatqany qýantatynyn aitty.
«Bizdiń bolashaǵymyz - jastar. Sondyqtan, úlken sportta urpaqtar sabaqtastyǵy bolǵany abzal. Biz bar bilgenimizben jas býynǵa bólissek, bizden keiingiler de tájiribesimen bólisip, kishige úiretip otyrady dep senemin. Osyndai ashyq kezdesýler balalardyń sportqa degen qulshynysyn odan ári oiatyp, jigerlendiretini anyq», - deidi sportshy.
Chempionmen kezdesýge sportshylar ǵana emes, olardyń ata-analary men Eldostyń elordadaǵy jankúierleri de jinaldy.
«Elimizde dziýdo óte qarqyndy damyp kele jatyr. Búginde eresekter, jastar, jasóspirimder quramasynyń bárinde aýyz toltyryp aitarlyqtai jetistikter bar. Olardyń barlyǵy ata-analardyń balaǵa durys jol baǵyttap, jattyqtyrýshylardyń balalarmen tyńǵylyqty jumysynyń nátijesinde dep oilaimyn», - dedi Smetov.
Kezdesý sońynda QR Eńbek sińirgen jattyqtyrýshysy Bolat Daniiarov bastaǵan bir top bapkerler quramy Eldosqa alǵysyn aityp, shapan jaýyp, aldaǵy álem chempionatyna sáttilik tiledi.
Sportshy 25 tamyz – 1 qyrkúiek arasynda Japoniianyń Tokio qalasynda ótetin dziýdodan Álem chempionatyna qatysady.
