QR Premer-Ministri Asqar Mamin Amerika saýda palatasynyń Atqarýshy direktory Doris Bredbiýrimen, Ulybritaniia elshisi Maikl Giffordpen, Kanada elshisi Nikolas Brýssomen, Eýropalyq odaq elshisi Sven-Olov Karlssonmen, QR-daǵy AQSh isteri jónindegi ýaqytsha senimdi ókili Teodor Lingpen kezdesý ótkizdi, dep habarlaidy "Ult aqparat" primeminister.kz saityna silteme jasap.
Kezdesý barysynda investitsiialyq yntymaqtastyqty jáne QR Úkimetiniń investorlardy qoldaý ekojúiesin damytý jónindegi jańa tásilderi aiasynda ózara is-qimyldy odan ári arttyrý máseleleri talqylandy.
QR Premer-Ministri A. Mamin ekonomika damýynyń, saýda jáne investitsiialar ósiminiń oń qarqynyn atap ótti. 2018 jyly Qazaqstanǵa tikelei sheteldik investitsiialardyń túsimi 15,8% ósip, $24 mlrd qurady. Ótken jyly Qazaqstannyń syrtqy saýda kólemi 20% ósti.
«Qazaqstan Úkimetiniń investitsiialardy tartýǵa asa qolaily jaǵdailar jasaýǵa ári investorlardyń quqyqtaryn qorǵaýdy kúsheitýge erekshe kóńil bólýi jáne QR Premer-Ministriniń oǵan tikelei qatysýy – investorlar úshin óte jaqsy belgi», — dedi Amerika saýda palatasynyń Atqarýshy direktory D. Bredbiýri.
Investitsiialyq yntymaqtastyq áleýetin atap óte otyryp, diplomatiialyq missiialardyń basshylary Qazaqstanda júrgizilip jatqan investitsiialyq ahýaldy jaqsartý jónindegi jumystardy qoldaityndaryn jáne tyǵyz yntymaqtastyqty odan ári jalǵastyrýǵa múddeli ekenderin bildirdi. Olardyń pikirinshe, investitsiialyq jobalardy iske asyrýmen bailanysty barlyq máselelerdi QR Premer-Ministriniń tóraǵalyǵymen Úilestirý keńesi deńgeiinde tikelei ári erkin talqylaý múmkindigi — investorlar tarapynan senimniń artýynyń mańyzdy faktory.
Óz kezeginde QR Premer-Ministriniń birinshi orynbasary – qarjy ministri Á. Smaiylov, «Astana» halyqaralyq qarjy ortalyǵynyń basqarýshysy Q. Kelimbetov sheteldik investitsiialardy belsendi túrde tartýdyń jańa tásilderine toqtalyp ótti. Investorlarmen belsendi jumys júrgizýdiń aimaqtyq habyna ainalatyn AHQO sátti jumys istep tur. Onyń aýmaǵynda qolaily jumys isteýge jáne investitsiialyq jobalardy iske asyrýǵa barlyq qajetti jaǵdailar jasalǵan. Bul aǵylshyn quqyǵy qaǵidalaryna negizdelgen TMD keńistigindegi alǵashqy, biregei quqyqtyq rejim, táýelsiz sot jáne arbitraj ortalyǵy.
Kezdesýdi qorytyndylai kele, QR Premer-Ministri A. Mamin investitsiialyq ahýaldy odan ári jaqsartyp, sheteldik investorlarǵa jáne Qazaqstanda biznes júrgizýge qolaily jaǵdailar jasaýǵa barlyq kúsh-jigerdiń jumyldyrylatynyn aitty.
«Biz ózara is-qimylymyzdy jandandyrýǵa múddelimiz. Investitsiialar tartý jónindegi jańa kúsheitilgen sharalar investitsiialyq yntymaqtastyqqa eleýli qarqyn bererine senemiz», — dedi A. Mamin.
